मानसिक आरोग्याबाबत भारत आजही अंधारयुगात

महात्मा गांधी आणि कस्तुरबा गांधी यांच्या १५० व्या जयंतीनिमित्ताने स्नेहालय परिवाराच्या वतीने ‘बा आणि बापू’ हा पुरस्कार प्रदान उपक्रम सुरू केला आहे. पहिल्याच बापू पुरस्काराने मानसोपचारतज्ज्ञ डॉ. वटवानी आणि बा पुरस्काराने बुलढाणा येथील सेवासंकल्प संस्थेच्या संचालिका आरती नंदू पालवे यांना सन्मानित करण्यात आले. केडगाव येथील सौ. रूपाली मुनोत, बालकल्याण संकुलात २४ डिसेंबर रोजी हा कार्यक्रम झाला. यावेळी वटवानी बोलत होते.

यावेळी पद्मश्री पोपटराव पवार, नीळकंठ आव्हाड, ज्येष्ठ पत्रकार आणि लेखक महावीर जोंधळे, कामोद खराडे आणि इंदुमती जोंधळे यांच्या हस्ते मान्यवरांना हा पुरस्कार प्रदान करण्यात आला. यावेळी मानसोपचारतज्ज्ञ डॉ. नीरज करंदीकर यांनी डॉ.वटवानी यांची तर समुपदेशक दीपा निलेगावकर यांनी आरती पालवे यांची मुलाखत घेतली.

डॉ. वटवानी यांनी कर्जत (जि. रायगड) येथे श्रद्धा रिहॅबिलिटेशन फाऊंडेशनची स्थापन करून दहा हजारांवर अधिक मानसिक आजारी रुग्णांना संपूर्ण बरे केले. या कार्यासाठी डॉ. वटवानी यांना जगातील प्रतिष्ठेचा रॅमन मॅगसेसे पुरस्कार मिळाला आहे.

चिखली (जि. बुलढाणा ) येथे मानसिक आजारी रुग्णांची सेवा-सुश्रूषा आणि कौटुंबिक पुनर्वसन आरती आणि नंदू पालवे या दांपत्याने कुठलीही संसाधने आणि पाठबळ नसताना केली. अहमदनगर शहर आणि पंचक्रोशीत बेवारस मनोरुग्ण मुक्त करण्यासाठी सर्व मानसोपचारतज्ज्ञ, इतर डॉक्टर, संस्था आणि संवेदनशील नागरिकांनी एकत्रित काम करावे, असे आवाहन वटवानी व पालवे यांनी केले. यावेळी जोंधळे यांनीही उपस्थितांना मार्गदर्शन केले. सूत्रसंचालन डॉ. दया भोर यांनी सूत्रसंचालन केले. राजीव कुमार यांनी आभार मानले.

फोटो २६ पुरस्कार

ओळी- स्नेहालय परिवाराच्या वतीने डॉ. भरत वटवानी यांना पद्मश्री पोपटराव पवार यांच्या हस्ते बापू हा पुरस्कार प्रदान करण्यात आला.