पोळ्याच्या मिरवणुकीत मातीच्या बैलाला पहिला मान

तिसगाव : पाथर्डी तालुक्यातील श्री क्षेत्र हनुमान टाकळी गावाने प्रत्येक सण, उत्सव आगळ्यावेगळ्या पद्धतीने साजरा करण्याची परंपरा अद्यापही कायम ठेवली आहे. विशाल अशा मातीच्या बैलाला येथील पोळ्याच्या सार्वजनिक मिरवणुकीचा पहिला मान दिला जातो. ही परंपरा तब्बल ३८० वर्षांची आहे.

मातीच्या बैलाला देवाचा बैल समजून वादाला तिलांजली देत मिरवणुकीचा पहिला मान येथे दिला जातो. हनुमान दैवत हे बल आणि भक्तीचे मानले गेले आहे. येथील समर्थ हनुमान मूर्तीची प्रतिष्ठापना समर्थ रामदास स्वामी यांच्याहस्ते केल्याचे सांगितले जाते. श्रावणी दर्श अमावास्या ६ सप्टेंबर (सोमवार) सूर्यास्ताला हा आगळावेगळा पोळा सण यावर्षीही सार्वजनिकरित्या साजरा होत आहे. त्याची तयारी पूर्ण झाली आहे, अशी माहिती देवस्थानचे अध्यक्ष रमेशआप्पा महाराज यांनी दिली.

पोळ्याच्या दिवशी सायंकाळी गावातील शेतकऱ्यांचे सजविलेले बैल वाजत-गाजत मंदिर आवारात जमतात. देवासह बैलांचेही पाद्यपूजन करीत पुरणपोळीचा नैवेद्य खाऊ घातला जातो. मिरवणुकीत पुढे देवाचाच (मातीचा प्रतिकात्मक) बैल पुजाऱ्याच्या डोईवर असतो. मंदिर प्रदक्षिणा वाजतगाजत वेशीतील आंब्याच्या तोरणाखालून जाते. मगच सर्व शेतकरी आपल्या बैलाला नारळ फोडत मंदिर प्रदक्षिणा घालतात व घरी नेतात. घरच्या कारभारणीने बैलासह मालकाला ओवाळले की, मगच बैल दावणीला जातात. तेथेही त्यांना भाकरी गुळाच्या लाडूंची मेजवानी असते. असा पोळा रंगत जातो.

वादामुळे तालुक्यात वीस गावांतील पोळ्यावर प्रशासनाने बंदी घातली आहे. परंतु, टाकळी येथे ही परंपरा आजही आनंदाने पाळली जात आहे.