वीजपंपांची थकबाकी भरल्यास शेतकऱ्यांना सवलत

राहुरी (जि. अहमदनगर) : राज्यात वीज बिलांची ४५ हजार ७१० कोटी रुपयांची थकबाकी आहे. त्यात वीजपंपांची १५ हजार ३२५ कोटी रुपये आहे. शेतकऱ्यांनी थकीत वीज बिल भरल्यास त्यावर शेतकऱ्यांना व्याज व दंड आकारणी यात सवलत देण्यात येईल, अशी घोषणा उपमुख्यमंत्री अजित पवार यांनी केली. ग्रामपंचायतींनी शासकीय जमीन महाविरतणला उपलब्ध करून दिल्यास त्यांनाही दरवर्षी महावितरणकडून हक्काचा उत्पन्नाचा स्रोत निर्माण होईल, असेही पवार म्हणाले.

राहुरीत सहा सौर ऊर्जा प्रकल्पाच्या भूमिपूजनप्रसंगी पवार बोलत होते. कार्यक्रमाच्या अध्यक्षस्थानी नगरविकास व ऊर्जा राज्यमंत्री प्राजक्त तनपुरे होते. पवार म्हणाले, कृषी वीज बिल वसुलीसाठीच्या या योजनांचा शेतकऱ्यांनी लाभ घ्यावा. नगर जिल्ह्यात ४ हजार ९९८ कोटी रुपयांची वीज बिल थकबाकी आहे. जिल्ह्यात वसूल होणाऱ्या रकमेपैकी ६६ टक्के निधी वीजनिर्मितीच्या, वीज वितरणाच्या जिल्ह्यातील पायाभूत सुविधांसाठी उपलब्ध केला जाईल. मुख्यमंत्री सौर ऊर्जा प्रकल्पांतर्गत जिराईत जमीन शेतकऱ्यांनी महावितरणला उपलब्ध करून दिल्यास एकरी ३० हजार रुपये महावितरणकडून दिले जातील. शासकीय जमिनी ग्रामपंचायतीने उपलब्ध करून दिल्या तर दरवर्षी त्यांनाही उत्पन्नाचा एक निश्चित स्रोत उपलब्ध होईल. वांबोरी चारीच्या सुधारित दुसऱ्या टप्प्यासाठी निधी उपलब्ध करून दिला जाईल. निळवंडे धरणाच्या कालव्याची कामे मार्गी लावली जातील, असे आश्वासन पवार यांनी दिले. यावेळी आ. लहू कानडे, आशुतोष काळे, संग्राम जगताप, माजी खासदार प्रसाद तनपुरे, नगराध्यक्ष अनिता पोपळघट, अनुराधा आदिक, सुरेश वाबळे, निर्मलाताई मालपाणी, धनराज गाडे, डॉ. उषाताई तनपुरे, सोनाली तनपुरे, सभापती बेबीताई सोडनर आदी उपस्थित होते.

...................

बसस्थानकासाठी तरतूद करणार

राहुरी, ताहराबाद, आरडगाव, गणेगाव, बाभूळगाव या सहा ठिकाणी १९ अश्वशक्तीचे सौर ऊर्जा प्रकल्प सुरू होत असून, या सहा महिन्यांत ते पूर्ण होतील, असे सांगत तनपुरे यांनी राहुरी ग्रामीण रुग्णालय, राहुरी बसस्थानक, निळवंडे कालव्याच्या प्रश्नांकडे मंत्री तनपुरे यांनी पवारांचे लक्ष वेधले. त्यावर पवार यांनी राहुरी बसस्थानकासाठी आगामी अर्थसंकल्पात निधीची तरतूद करण्याचे आश्वासन दिले.

.............

यांच्यापुढे डोके फोडून घ्यावे का

वांबोरी (ता. राहुरी) येथील मुख्यमंत्री सौर ऊर्जा प्रकल्पाच्या उद्घाटन कार्यक्रमात विनामास्क आलेल्या लोकांना पाहून अजित पवार यांच्या संतापाचा पारा चांगलाच चढला. ते म्हणाले, कोरोनामुळे राज्यावर आर्थिक संकट आले आहे. कोरोनाला हसण्यावारी घेऊ नका. अनेक जण नियमांचे पालन करताना दिसत नाहीत. हे बघा हे पठ्ठे येथे विनामास्क फिरत आहेत. आता यांच्यापुढे डोके फोडून घ्यावे का, अशा शब्दांत पवारांनी आपला संताप व्यक्त केला.