शहराच्या बजेटची मिटिंग अवांतर विषयातच विरली !

कोपरगाव : कोपरगाव नगर परिषदेची २०२१ - २०२२ या वित्तीय वर्षातील २२० कोटींचे बजेट सादर करून त्यास खर्चाची मंजुरी देण्यासाठी नगर परिषदेच्या सभागृहात गुरुवारी ( दि. २५ ) नगराध्यक्ष विजय वहाडणे यांच्या अध्यक्षतेखाली दोन तास विशेष सर्वसाधारण सभा पार पडली. मात्र, या सभेत नगरसेवकांनी बजेटमधील खर्चाचा विषय बाजूला ठेवत इतर अवांतर विषयावरील चर्चेतच ही सभा संपली. विशेष म्हणजे सभागृहात उपस्थित असलेल्या महिला नगरसेविका यांनी बजेटविषयी चकार शब्दही काढला नाही.

सकाळी ११ वाजता सभेची सुरुवात झाली. बजेटमधील खर्चाचे विषय वाचण्यात आले. सुरुवातीलाच काही नगरसेवकांनी नगरपरिषदेच्या उत्पन्न वाढीवर चर्चा सुरु केली. त्यामध्ये प्रामुख्याने शहरातील पालिकेच्या मालकीचे गाळे ज्यांना दिले आहेत. ते भाडे अथवा डिपॉझिट देत नसतील, तर त्यांना बाहेर काढा. काही गाळ्यात अवैध धंदे सुरू आहेत. त्यांचा बंदोबस्त करा, ज्यांनी हे गाळे घेतले आणि दुसऱ्याला परस्पर विकून टाकले, त्यांचा शोध घेऊन त्यांच्यावर कारवाई करा. तसेच आजही काही गाळे तसेच पडून आहेत. त्यांचे लिलाव करा, २७ वर्षाचे करार करा. शहरात अनेक रिकामे प्लॉट आहेत. त्यांचे मालक त्यांची निगा राखत नाहीत. त्यामुळे मोठा त्रास होतो. तसेच घरपट्टी आकारताना त्यांचे फेर सर्वेक्षण करा. त्यांनाही कर सुरु करा जेणेकरून पालिकेच्या उत्पन्नात वाढ होईल, असे सांगण्यात आले.

या विषयावर पडता पडतो न पडतो तोच प्रभागातील समस्या आणि सूचनांचे चर्चासत्र सुरु झाले. त्यात कोणी पाण्याची समस्या सोडविण्यासाठी नगरपरिषदेने प्रभागात, उपनगरात मोठ्या प्रमाणात बोअर घ्यावे, काही उपनगरात विहिरी आहेत, त्या ताब्यात घेऊन नागरिकांना तेथून पाणी द्यावे. तसेच काही ठेकेदार हे फक्त कामे घेऊन ठेवतात. वेळेत काम न करणाऱ्या ठेकेदारांवर कारवाईची मागणी केली. विशेष म्हणजे ज्या गाळेधारकांनी आजतागायत डिपॉझिटची रक्कम दिली नाही त्यांचे गाळे सील करा, अशी भूमिका नगराध्यक्षानी घेतली. अशा अन्य विषयांवर चर्चा झाल्यानंतर दोन तासांनी बजेटचा मुद्दा बाजूला राहून सभा संपन्न झाली.

............

बजेटच्या खर्चावर चकार शब्द नाही

बजेटच्या सभेत उपस्थित नगरसेवकांनी नगरपरिषदेच्या उत्पन्नात कशी वाढ होईल, यावर दोन तास चर्चा केली. मात्र, त्याच उत्पन्नातून होणाऱ्या २२१ कोटींच्या खर्चाची मंजुरी देण्यात यावी, यासाठी आयोजित केलेल्या सभेत एकाही नगरसेवकाने बजेटमधील खर्चाविषयी चकार शब्दही काढला नाही. त्यामुळे उत्पन्न कितीही वाढले, तरी होणारा खर्च हा योग्य आहे की नाही, हे न तपासता खर्चाला मजुरी दिली जाते. याला नगरसेवकांचे औदार्यच म्हणावे लागेल.

.............

सभेतील खुर्च्या रिकाम्या...

विशेष म्हणजे इतर सर्वच सर्वसाधारण सभेला, मासिक बैठकीला आवर्जून हजर राहणाऱ्या अनेक नगरसेवकांनी या बजेटच्या सभेला दांडी मारली. त्यामुळे सभागृहातील अनेक खुर्च्या रिकाम्या होत्या.

............

२५- बजेट सभा - कोपरगाव