कोविड रुग्णांच्या सान्निध्यातच नाताळ सण साजरा

जामखेड : आरोळे कोविड केअर सेंटर जामखेड तालुक्यातील कोरोना रुग्णांची मोफत सेवा करीत आहे. या महामारीमुळे दीड हजारांवर कुटुंबे बाधित झालेली असताना नाताळ सण आनंदात साजरा करणे आम्हाला शक्य नाही. त्यामुळे यावर्षीचा नाताळ कोविड रुग्णांच्या सान्निध्यात साध्या पद्धतीने साजरा करण्यातच आम्हाला आनंद आहे, असे आरोळे कोविड सेंटरचे संचालक रवी आरोळे यांनी सांगितले.

जामखेड शहरातही नाताळचे मोठे आकर्षण असते. कोरोनाच्या पार्श्वभूमीवर यावर्षी कोणताही समारंभ न करता चर्च न भरवता, केवळ स्नेहाने गाठीभेटी घेत ऑनलाइनवर येशूंचा संदेश रेव्ह. डॉ. शोभा आरोळे यांनी ख्रिश्चन बंधूंना दिला.

याबाबत रवी आरोळे म्हणाले, पद्मभूषण डॉ. रजनीकांत आरोळे व डॉ. मेबल आरोळे या दाम्पत्यांनी २७ सप्टेंबर १९७० साली येथे या प्रकल्पाद्वारे आरोग्य सेवेचे छोटेखानी एक रोपटे लावले होते. आज पन्नास वर्षांत त्याचा विस्तार होऊन विशाल स्वरूप झाले आहे. ते माझे जन्मदाते होते याचा खूप गर्व आहे, त्यांच्या, येशू ख्रिस्तांच्या विचाराने आम्ही दोघे बहीण-भाऊ ही सेवेची धुरा वाहत आहोत. अनंत अडचणी आहेत. मात्र, आई-वडिलांच्या विचारानेच आम्ही घडल्याने आजपर्यंत आरोग्य सेवा गरीब दुबळ्यांना प्रदान करीत आहोत, असेही त्यांनी सांगितले.