भावाचा खून

शिर्डी : व्यसनाधीन असलेल्या व कुटुंबातील व्यक्तींना त्रास देणार्‍या तरुणाचा त्याच्या मोठ्या भावाकडून झालेल्या मारहाणीत मृत्यू झाला़ या प्रकरणी शिर्डी पोलिसांनी या मयत तरुणाच्या मोठ्या भावाला ताब्यात घेतले आहे़ पोलिसांच्या माहितीनुसार लक्ष्मण गणपत गुठळे (वय २८ ) हा व्यसनाधीन होता़ त्याची पत्नीही आठ महिन्यापासून माहेरी होती़ लक्ष्मण आपल्या आईला व मोठा भाऊ संतोष यास नेहमी मारहाण व शिवीगाळ करीत असे़ रविवारी रात्री असाच प्रकार घडल्याने संतोष याने लक्ष्मणला धडा शिकवण्यासाठी मारहाण केली़ यात लक्ष्मणला जीवे मारण्याचा हेतू नसला तरी मारहाणीत त्याच्या डोक्याला व पायाला गंभीर दुखापत झाली़ मात्र जखमेचे गांभीर्य लक्षात न आल्याने लक्ष्मणला शेजारच्या खोलीत ठेवण्यात आले़ सकाळी दहाच्या सुमारास त्याला एका खासगी रुग्णालयात नेण्यात आले़ तेथे लक्ष्मणला दाखल न करुन घेतल्याने पुन्हा घरी नेण्यात आले व साडेतीनच्या सुमारास त्यास गंभीर मारहाण झाल्याचे पोलिसांना कळविण्यात आले़ त्यानंतर कुटुंबीयांनी त्याला संस्थान रुग्णालयात नेले़ तेथे त्याला मयत घोषित करण्यात आले़ या प्रकरणी नातेवाईकांकडून गुन्हा दाखल करण्यास अंत्यविधीचे कारण सांगून चालढकल होत असल्याचे लक्षात येताच सुनील पवार यांनी स्वत: फिर्याद दाखल केली़ मंगळवारी रात्री दहाच्या सुमारास पोलिसांनी संतोष याला ताब्यात घेतले़ तेथे त्याने कुणीतरी आपल्या भावाला मारहाण करुन घरासमोर आणून टाकल्याचे सांगत पोलिसांची दिशाभूल करण्याचा प्रयत्न केला़ मात्र पोलिसांनी अनेक दुव्यांचा अभ्यास करुन संतोषला बोलता केल्यावर वरील हकीगत समोर आल्याचे सहाय्यक पोलीस निरीक्षक पवार यांनी सांगितले़ उपअधीक्षक विवेक पाटील व प्रभारी पोलीस निरीक्षक मिस्त्रीलाल बंड यांच्या मार्गदर्शनाखाली सुनील पवार,शहाजी आढाव, औटी आदींनी अवघ्या चोवीस तासात खुनाची उकल केली़ सहाय्यक पोलीस निरीक्षक यशवंत बत्तीसे पुढील तपास करीत आहेत़ (वार्ताहर)