बारगाव नांदूर येथील अवैध उपशावर कारवाई करणार

राहुरी तालुक्यातील बारगाव नांदूर येथील मुळा नदीपात्रात मातीमिश्रित वाळूचा लिलाव अधिकृत आहे. वाळूचा ठेका घेतलेल्या ठेकेदाराला शेतजमिनीतून मातीमिश्रित वाळू उपसा करण्याची परवानगी दिली आहे. ३०० ब्रास वाळू उपशाची परवानगी असताना दररोज ५० ते ६० डंपरमधून हजारो ब्रास वाळूची वाहतूक सुरू आहे. या अवैध उपशामुळे बारागाव नांदूर ते राहुरी रस्त्याची अवस्था अत्यंत खराब झाली आहे. बारगाव नांदूर येथे १ मार्च रोजी काही महिला घरासमोर बसल्या होत्या. यावेळी रस्त्यावरून जाणाऱ्या डंपरच्या चालकाचे नियंत्रण सुटले आणि रस्त्यावरून वळण घेताना डंपर थेट महिलांच्या अंगावर गेला. मात्र, महिला सावध असल्याने अनर्थ टळला. मात्र, ग्रामस्थांनी वाळू उपसा करणाऱ्यांविरुद्ध तीव्र संताप व्यक्त केला.

दरम्यान, श्रीरामपूरचे प्रांताधिकारी अनिल पवार म्हणाले, राहुरी येथे प्रशिक्षणार्थी प्रांताधिकारी दयानंद जगताप हे काम पाहत आहेत. बारगाव नांदूर येथील अवैध वाळू उपसा आणि महिलांच्या अंगावर डंपर घालण्याच्या प्रकाराची सविस्तर माहिती घेतली जाईल. त्यानंतर संबंधितांवर कारवाई केली जाईल.

------------

लिलावाची चौथी फेरी

जिल्ह्यात १८ पैकी तीन रेतीघाट सरकारी कामांसाठी राखीव असून, संगमनेर तालुक्यातील एका रेतीघाटाचा लिलाव झाला आहे. उर्वरित १४ रेतीघाटांसाठी तीनवेळा लिलाव प्रक्रिया राबविण्यात आली. मात्र, त्याला प्रतिसाद मिळाला नाही. त्यामुळे ई-लिलाव व ई-बोलीसाठी चौथ्यांदा फेरी जाहीर करण्यात आली आहे. नदीपात्रात मोठ्या प्रमाणावर पाणी असून, बोटीने उपसा करण्यास परवानगी नाही. त्यामुळे लिलावास प्रतिसाद नसल्याचे प्रशासनाने सांगितले.