देवळाली प्रवरा (जि. अहमदनगर) : उपमुख्यमंत्री अजित पवार यांचे आजोळ असलेल्या राहुरी तालुक्यातील देवळाली प्रवरा येथील मुख्य चौकात अजित पवारांच्या वाढदिवसानिमित्त बॅनर लावण्यात आला असून या बॅनरवर अजित पवारांचा 'जनमनातील मुख्यमंत्री' असा उल्लेख करण्यात आला आहे. त्यामुळे राजकीय वर्तुळाच चर्चांना उधाण आले आहे.
अजित पवार यांच्या वाढदिवसानिमित्ताने अजित पवार यांचे नातेवाईक असलेले अजित कदम, शैलेंद्र कदम व राष्ट्रवादी शहराध्यक्ष केदारनाथ चव्हाण तसेच पदाधिकारी व सदस्यांनी बॅनरबाजी केली आहे. यावर 'जनतेच्या मनातील मुख्यमंत्री अजितदादा पवार', असा मजकूर लिहिण्यात आला आहे. या बॅनरवर अजित पवारांसह शरद पवार यांचाही फोटो आहे.
एप्रिल महिन्यात पुण्यात अजित पवार यांचे भावी मुख्यमंत्री म्हणून बॅनर लागले होते. तसेच अजित पवारांची सासुरवाडी असणाऱ्या धाराशिव जिल्ह्यातील तेर येथेही असे बॅनर लागले होते. आज अजित पवार यांचे आजोळ असलेल्या देवळाली प्रवरा शहरात जनमनातील मुख्यमंत्री असा उल्लेख असलेला फलक झळकल्याने राजकीय वर्तुळात चर्चेला उधाण आले आहे.