पंचायत समिती कर्मचाऱ्याची ऑडिओ क्लिप व्हायरल

नेवासा : तालुक्यात शासकीय अधिकाऱ्यांवर ऑडिओ बॉम्बचा वापर वाढत आहे. पोलीस कर्मचाऱ्यानंतर आता पंचायत समिती कर्मचाऱ्याचा संदिग्ध ऑडिओ व्हायरल झाल्यानंतर तालुक्यात पुन्हा खळबळ उडाली आहे. यानंतर भाजप कार्यकर्त्यांनी निवेदन देत अधिकाऱ्यांना जाब विचारला.

बचत गटाचे लाभार्थी आणि पंचायत समिती अधिकारी यांचे ‘प्रत्येकी एक हजार रुपये मागितल्याप्रमाणे द्यावेत’ अशा अर्थाची ऑडिओ क्लिप दोन- तीन दिवसांपासून तालुक्यात सोशल मीडियावर धुमाकूळ घालीत आहेत. या पार्श्वभूमीवर भाजपच्या कार्यकर्त्यांनी पंचायत समितीमध्ये या प्रकरणाच्या चौकशीसाठी निवेदन दिले.

दोन-तीन दिवसांपूर्वी कांगोनी येथील एकाने एका अधिकाऱ्याशी फोनवर चर्चा केली. त्यामध्ये त्या अधिकाऱ्याने ४० हजार रुपये कर्ज घेण्यासाठी एक हजार रुपये द्यावे लागेल, अशी स्पष्टपणे मागणी केली. प्रत्येक सदस्याकडून एक हजार रुपये जमा केले. तालुक्यामध्ये जवळपास बचत गटाच्या १२ हजार महिला सदस्या आहेत. त्यामुळे ही दिसणारी एक हजार रुपयांची रक्कम म्हणजे कोट्यवधी रुपयांचा भ्रष्टाचार आहे आणि हे धागेदोरे कोणापर्यंत जातात हा प्रश्न जनतेला पडला आहे, असे निवेदनात म्हटले आहे.

यावेळी भाजपचे तालुकाध्यक्ष भाऊसाहेब फुलारी, युवा मोर्चाचे तालुकाध्यक्ष प्रताप शिंदे, किसान मोर्चाचे तालुकाध्यक्ष ऋषिकेश शेटे, शहर युवा मोर्चा अध्यक्ष प्रतीक शेजूळ, आकाश देशमुख, बंडू शिंदे, युवा मोर्चाचे उपाध्यक्ष उमेश चावरे, सोशल मीडियाचे अध्यक्ष आदिनाथ पटारे, संघटन सरचिटणीस अमोल कोलते आदी उपस्थित होते.