अडीच वर्षांनंतर शहर बँकेतील अपहारप्रकरणी दोषारोपपत्र दाखल

अपहारातील मुख्य सूत्रधार डॉ. नीलेश विश्वास शेळके याच्याविरोधात प्रथम दोषारोपपत्र दाखल करण्यात आले असून, फॉरेन्सिक ऑडिटच्या अहवालानंतर उर्वरित आरोपींविरोधात पुरवणी दोषारोपपत्र दाखल केले जाणार असल्याचे या गुन्ह्याच्या तपासी अधिकारी तथा पोलीस उपअधीक्षक प्रांजल सोनवणे यांनी सांगितले.

नगर शहरात उभारण्यात आलेल्या एम्स हॉस्पिटलमध्ये मशिनिरी खरेदीसाठी डॉ. नीलेश शेळके याने बँकेच्या संचालक मंडळाशी संगनमत करून बनावट कागदपत्रांच्या आधारे परस्पर कर्ज मंजूर करून आर्थिक फसवणूक केली, अशा प्रकारची फिर्याद राहुरी येथील डॉ. रोहिणी भास्कर सिनारे, श्रीरामपूर येथील डॉ. उज्ज्वला रवींद्र कवडे व नगरमधील डॉ. विनोद अण्णासाहेब श्रीखंडे यांनी कोतवाली पोलीस ठाण्यात सप्टेंबर २०१८ मध्ये दाखल केली होती. या तिघांची प्रत्येकी ५ कोटी ७५ लाख रुपयांची फसवणूक झाली असल्याचे फिर्यादीत म्हटले होते. त्यानुसार डॉ. शळके याच्यासह बँकेचे संचालक मंडळ, अधिकारी व मशिनरी वितरकांविरोधात तीन स्वतंत्र गुन्हे दाखल झाले होते. हे प्रकरण आर्थिक गुन्हे शाखेकडे वर्ग केल्यानंतर उपअधीक्षक सोनवणे यांनी या गुन्ह्याचा तपास केला.

----------------------------------

दोन गुन्ह्यात २५, तर एका गुन्ह्यात २२ आरोपी

बोगस कर्जवाटपप्रकरणी पोलिसांनी दाखल केलेल्या दोन दोषारोपपत्रात डॉ. शेळके याच्यासह २५ जणांची नावे नमूद आहेत, तर तिसऱ्या दोषारोपपत्रात २२ आरोपींची नावे नमूद आहेत. शेळके याच्याव्यतिरिक्त इतर कुणावर सध्या दोष ठेवण्यात आलेला नाही. फॉरेन्सिक ऑडिटमध्ये पैशांचे हस्तांतरण कुणाकडून कसे झाले, त्याला जबाबदार कोण होते, हे समोर आल्यानंतर पुराव्यांच्या आधारे इतरांविरोधात दोषारोपत्र दाखल केले जाणार असल्याचे दाखल दोषारोपपत्रात नमूद करण्यात आलेले आहे.

-----------------------------------

हप्त्याचे पत्र आल्यानंतर अपहार उघड

फिर्याद देणाऱ्या तीनही डॉक्टरांना त्यांच्या नावाने बँकेने कर्ज मंजूर केल्याचे माहीतच नव्हते. अचानक कर्जाचे हप्ते भरण्याबाबत पत्र आल्यानंतर, आपल्या नावाने बोगस कर्ज उचलून फसवणूक करण्यात आल्याचे त्यांच्या लक्षात आले. त्यानंतर याप्रकरणी गुन्हा दाखल केला.

----------------------------

फॉरेन्सिक ऑडिटमध्येच अडकलाय तपास

खुनाच्या गुन्ह्यातील आरोपी शोधत असताना एलसीबी पथकाला फरार डॉ. शेळके २६ डिसेंबर २०२० रोजी पुणे येथे मिळून आला. त्यानंतर त्याला आर्थिक गुन्हे शाखेने वर्ग करून घेतले. या गुन्ह्याचे तब्बल दीड वर्षापासून फॉरेन्सिक ऑडिट सुरू असून त्या अहवालानंतरच तपास पूर्ण होईल, असे तपासी अधिकारी यांचे म्हणणे आहे. डॉ. शेळके याच्याविरोधात फॉरेन्सिक ऑडिटशिवाय दोषारोपपत्र दाखल झाले, तसे इतर आरोपींविरोधात का कारवाई केली जात नाही, असा प्रश्न उपस्थित होत आहे. विशेष म्हणजे शेळकेव्यतिरिक्त या गुन्ह्यात एकाही आरोपीला अटक केलेली नाही.