अण्णा नवथर, अहमदनगर: गावातील शेळ्या चाेरल्याच्या संशयातून जमावाने अमानुषपणे मारहाण करत तरुणाला जीवे ठार मारल्याची धक्कादायक घटना गुरुवारी (दि. ४) दुपारी पांगरमल ग्रामपंचायतीसमोर ( ता. नगर ) घडली. चांगदेव नामदेव चव्हाण (वय २५, रा. पखोरा, ता. गंगापूर, जि. छत्रपती संभाजीनगर ) असे मयत तरुणाचे नाव आहे. या प्रकरणी सरपंचासह २० ते २५ जणांविरोधात एमआयडीसी पोलिस ठाण्यात खूनाचा गुन्हा दाखल करण्यात आला आहे.
पांगरमल ग्रामपंचायतीचे सरपंच महादेव अमोल आव्हाड, महादेव आव्हाड, उध्दव महादेव आव्हाड, संदीप पंढरीनाथ आव्हाड व २० ते २५ जण, असे गुन्हा दाखल झालेल्या इसमांची नावे आहेत. याबाबत एका महिलेने फिर्याद दिली आहे. गावातील शेळ्या चोरतो, असे म्हणत आरोपींनी जमाव जमवून तरुणाला अमानुषपणे मारहाण केली. या मारहाणीत चांगदेव चव्हाण या तरुणाचा मृत्यू झाला. तसेच आरोपी उध्दव आव्हाड व इतरांनी जातीवाचक शिवीगाळ करत महिलेचा विनभयंग करून जीवे मारण्याची धमकी दिली असल्याचे फिर्यादीत म्हटले आहे. पुढील तपास एमआयडीसी पोलिस करत आहेत.