विद्यार्थ्यांच्या हाती ७ लाख वह्या

पारनेर : महानगर बँकेचे संस्थापक गुलाबराव शेळके प्रतिष्ठानने पहिली ते दहावीच्या विद्यार्थ्यांना वाटलेल्या सात लाख वह्या, पहिली ते आठवी पर्यंतच्या विद्यार्थ्यांना शासनाच्या वतीने देण्यात आलेली पावणेतीन लाख पुस्तके व म्हस्केवाडीतील जिल्हा परिषदेच्या शाळेत माजी विद्यार्थ्यांने ट्रकभर वाटलेले शालेय साहित्य असा खजिनाच पारनेर तालुक्यातील सुमारे ७० हजार विद्यार्थ्यांना शाळेच्या पहिल्याच दिवशी मिळाला.
पहिली ते दहावीच्या विद्यार्थ्यांचा सोमवारी शाळेचा पहिलाच दिवस होता. शाळेत आल्यावर विद्यार्थ्यांचे थाटात स्वागत झालेच. पण पहिले ते आठवीच्या विद्यार्थ्यांना मोफत पुस्तके वाटप शालेय शिक्षण विभागाने राबविला़ त्यामुळे सुमारे तीस हजार विद्यार्थ्यांना पावणेतीन लाख पुस्तकांचे वाटप करण्यात आल्याचे गटशिक्षणअधिकारी के. एल. पटारे यांनी सांगितले. शिक्षणविस्तारअधिकारी कुंडलिक ढोरमले, मंजाबापु तांबे, विनीत लाळगे व केंद्र प्रमुखांनी याचे नियोजन केले.
महानगर बँकेचे संस्थापक गुलाबराव शेळके सामाजिक प्रतिष्ठानच्या वतीने जिल्हा बँकेचे उपाध्यक्ष उदय शेळके, महानगरचे संचालक सुरेश ढोमे, अनिल चौधरी, बाळासाहेब काळभोर, डॉ. नरेंद्र मुळे यांच्या हस्ते अनेक शाळांमध्ये पहिली ते दहावीच्या साठ हजार विद्यार्थ्यांना मोफत सात लाख वह्या वाटप करण्यात आल्या़
म्हस्केवाडी प्राथमिक शाळेत माजी विद्यार्थी व मुंबईचे पोलीस निरीक्षक संतोष खडके यांनी वह्या, पुस्तके, कंपास व इतर शालेय साहित्य असणारी एक ट्रक भरूनच शाळेसमोर आणली़ शाळेच्या शिक्षकांमार्फत विद्यार्थ्यांना या साहित्याचे वाटप करण्यात आले़ विद्यार्थ्यांच्या हातात शालेय साहित्य पडताच विद्यार्थ्यांनी आनंद व्यक्त केला़ (तालुका प्रतिनिधी)
वरिष्ठ अधिकाऱ्यांनी केले मुलांचे स्वागत
पारनेर तालुक्यात सर्वाधिक वरिष्ठ अधिकाऱ्यांनी हजेरी लावित विद्यार्थ्यांचे स्वागत केले. दरोडी येथे जि.प.प्राथमिक शाळेत जिल्हा परिषदेचे मुख्य वित्त व लेखा अधिकारी अरूण कोल्हे यांनी विद्यार्थ्यांचे स्वागत केले. यावेळी जिल्हा परिषद सदस्या मंदा भोसले, सरपंच कैलास कड, उपसरपंच मंगल भोसले, तुकाराम पावडे, शिक्षक दादाभाऊ कोल्हे, नामदेव शेरकर, राजेश गायकवाड, अनिल पावडे उपस्थित होते.
जिल्हा परिषदेचे उपमुख्यकार्यकारी अधिकारी जगन्नाथ भोर यांनी ढवळपुरीच्या आदीवासी भागातील लमाणतांडा येथील शाळेत मुलांना गुलाबपुष्प देऊन स्वागत केले़ यावेळी केंद्र प्रमुख भास्कर गागरे, नेमिचंद राठोड, अनिता राठोड, काशिनाथ चव्हाण, देवीदास राठोड, मुख्याध्यापक राजू नरवडे, रहेमान शेख आदी उपस्थित होते़ रोहिदास पवार यांनी विद्यार्थ्यांना मिष्ठान्न भोजन दिले़
अधिकाऱ्यांच्या स्वागताने चिमुकले हरखली
शाळेच्या पहिल्या दिवसाची विद्यार्थ्यांनीही जोरदार तयारी केली होती़
उपमुख्यकार्यकारी अधिकारी जगताप यांनी वाळवणे, जिल्हा ग्रामीण विकास प्रकल्प संचालक गावडे यांनी राळेगणसिध्दी, नारायणगव्हाण येथील शाळांमध्ये विद्यार्थ्यांचे स्वागत केले.
खडकवाडी कुरणवाडी येथे मुुख्याध्यापक रंगनाथ रोहोकले, बापु तांबे यांनी स्वागत केले. वरिष्ठ अधिकाऱ्यांनीच शाळेत येऊन स्वागत केल्याने चिमुकली मुलेही हरखुन गेले.