कुपवाडमध्ये अट्टल चोरट्यास अटक, घरफोड्यांचा छडा

कुपवाड शहरातील आस्की बेकरी आणि अर्जुन मोबाईल शॉपी फोडणारा अट्टल चोरटा प्रवीण प्रल्हाद भोसले (वय ३१, रा. हनुमाननगर, कुपवाड, मूळ गाव : कुंभोज, जि. कोल्हापूर) यास शनिवारी पहाटे कुपवाड पोलिसांनी अटक केली.

ठळक मुद्देमोबाईल, एलईडीसह ४० हजारांचा माल जप्तआणखी काही घरफोड्या, चोरीच्या घटना उघडकीस येण्याची शक्यता

कुपवाड : शहरातील आस्की बेकरी आणि अर्जुन मोबाईल शॉपी फोडणारा अट्टल चोरटा प्रवीण प्रल्हाद भोसले (वय ३१, रा. हनुमाननगर, कुपवाड, मूळ गाव : कुंभोज, जि. कोल्हापूर) यास शनिवारी पहाटे कुपवाड पोलिसांनी अटक केली. त्याच्याकडील १२ मोबाईल, एलईडीसह सुमारे चाळीस हजार रुपयांचा मुद्देमाल जप्त केला. त्याच्यावर विश्रामबाग पोलिस ठाण्यात एक गुन्हा दाखल आहे.

शहरातील मल्लिकार्जुन शामराव लोहार यांचे अर्जुन मोबाईल शॉप हे दुकान मंगळवार, दि. १७ आॅक्टोबर रोजी मध्यरात्रीच्या सुमारास चोरट्यांनी फोडले होते.

या दुकानातील अकरा नवीन व चार रिपेअरीसाठी आलेले मोबाईल, असा एकूण २८ हजार ८०० रुपयांचा मुद्देमाल चोरीस गेला होता. त्यानंतर पुढील आठवड्यात गुरुवार, दि. २६ आॅक्टोबर रोजी मध्यरात्रीच्या सुमारास बिरू विठ्ठल आस्की यांची आस्की बेकरी ही चोरट्याने फोडली होती. याबरोबरच शहरासह परिसरात आणखी दोन ते तीन घरफोड्या झाल्या होत्या.

या पार्श्वभूमीवर गुन्हे प्रकटीकरण शाखेचे हवालदार प्रवीण यादव, नितीन मोरे यांनी चोवीस तासाच्या आत अट्टल चोरट्यास मुद्देमालासह गजाआड केले. या चोरट्याकडून बारा मोबाईल, एलईडीसह सुमारे चाळीस हजार रुपयांचा मुद्देमाल जप्त केला.

चोरट्यांकडून आणखी काही घरफोड्या व चोरीच्या घटना उघडकीस येण्याची शक्यता पोलिसांनी वर्तविली. हवालदार रमेश जाधव, विश्वास वाघ अधिक तपास करीत आहेत.