Pune Crime: जातेगाव बुद्रुकमधील दरोड्यातील महिलेच्या मृत्यूप्रकरणी दोघांना अटक

जातेगाव बुद्रुक येथील कृष्णाबाई इंगवले या घरात झोपलेल्या असताना चोरट्यांनी घरात प्रवेश करून कृष्णाबाई यांना मारहाण करीत त्यांच्या गळ्यातील दोन तोळ्यांचे दागिने व काही रोकड लुटली होती....

शिक्रापूर (पुणे) : जातेगाव बुद्रुक (ता. शिरुर) येथे दरोड्यातील महिलेच्या मृत्यूप्रकरणी दोघांना अटक करण्यात आली आहे. प्रवीण दीपक भोसले (वय २१) व सोनू ऊर्फ समीर निकम भोसले (वय १९, दोघे रा. तळेगाव दाभाडे, ता. मावळ) असे अटक केलेल्या दोघांची नावे आहेत. जातेगाव बुद्रुक येथील कृष्णाबाई इंगवले या घरात झोपलेल्या असताना चोरट्यांनी घरात प्रवेश करून कृष्णाबाई यांना मारहाण करीत त्यांच्या गळ्यातील दोन तोळ्यांचे दागिने व काही रोकड लुटली होती. दरम्यान, चोरट्यांनी केलेल्या मारहाणीत कृष्णाबाई ज्ञानेश्वर इंगवले (वय ७६, रा. जातेगाव बुद्रुक) यांचा जागीच मृत्यू झाला होता.

याबाबत शिक्रापूर पोलिसांत फिर्याद दिली होती. स्थानिक गुन्हे अन्वेषण विभागासह शिक्रापूर पोलिसांच्या पथकाने परिसरातील सीसीटीव्हीसह आदी माहिती संकलित केली. आरोपींची माहिती पोलिसांना मिळाली. त्यांनतर पोलिसांनी आरोपींचा शोध घेतला असता गुन्ह्यातील आरोपी बाहेरील जिल्ह्यात फरार झाल्याचे समजताच शिक्रापूर पोलिसांचे दोन पथक व स्थानिक गुन्हे अन्वेषण विभागाच्या दोन पथकांनी दोघांना ताब्यात घेत चौकशी केली. अधिक तपास शिक्रापूर पोलिस करीत आहे.