द्रुतगती मार्गावर रस्ता ओलांडताना ठाण्य़ातील व्यक्तीचा मृत्यू

मुंबई पुणे द्रुतगती मार्गावर पिंपळोली गावाच्या हद्दीत अपघात.

कामशेत : मुंबई पुणे द्रुतगती मार्गावर पिंपळोली गावाच्या हद्दीत रस्ता ओलांडताना चारचाकी मोटारीची धडक बसून एकाचा मृत्यू झाला.

कामशेत पोलिसांनी दिलेल्या माहितीनुसार, रविवार ( दि. १६ ) रोजी मुंबई पुणे द्रुतगती मार्गावर दुपारी एक वाजण्याच्या सुमारास हरिचंद्र अर्फ्रीलाल यादव, लालचंद रमिराज यादव, मनोजकुमार यादव ( सर्व. रा. ठाणे ) हे ठाणे येथून मुन्ना यादव यांच्या चारचाकी मोटारीने पुण्यास जाण्यास निघाले होते. यावेळी पिंपळोली गावाच्या हद्दीत किलोमीटर नं. ६७/२०० जवळ गाडी रोडच्या कडेला लावून पलीकडे असलेल्या मॉलकडे जाण्यासाठी रस्ता ओलांडताना हरिचंद्र यादव यांना पुणे कडून मुंबई कडे जाणाऱ्या हुंदाई कारची ( क्र. एमएच १२ एल पी १३३७ ) या गाडीची धडक बसून अपघात झाला.

या अपघातात ते जागीच मृत्यू झाले असून या प्रकरणी पुढील तपास महेंद्र वाळूंजकर करीत आहेत.