युवकाच्या खूनप्रकरणी पाच जणांना अटक

इंद्रायणीनगर, भोसरीत २१ वर्षीय तरुणावर हत्याराने वार करून व डोक्यात दगड घालून शनिवारी सायंकाळी सहाच्या सुमारास खून करण्यात आला

पिंपरी : इंद्रायणीनगर, भोसरीत २१ वर्षीय तरुणावर हत्याराने वार करून व डोक्यात दगड घालून शनिवारी सायंकाळी सहाच्या सुमारास खून करण्यात आला. या हल्ल्यामध्ये दोन जण जखमी झाले असून, त्यांच्यावर खासगी रुग्णालयात उपचार सुरू आहेत. या प्रकरणातील चार आरोपींना पोलिसांनी शनिवारी रात्री तर एकाला रविवारी अटक केली.
रामा भीमराव गोटे (वय १९, रा. बालाजीनगर वसाहत, भोसरी) असे खून झालेल्या तरुणाचे नाव आहे. नागेश साहेबराव गायकवाड (वय २०), महेश ऊर्फ जॅकी मच्छिंद्र कांबळे (वय १९), ओंकार सचिन बांदल (वय २३), विकी बबन ओव्हाळ (वय २०, सर्व रा. बालाजीनगर वसाहत, भोसरी) अशी अटक करण्यात आलेल्या आरोपींची नावे आहेत. पोलिसांनी रविवारी सकाळी इंद्रायणीनगरमध्ये आणखी एकाला अटक केली आहे. याप्रकरणी राजेश स्वामी (वय २९, रा. दापोडी) याने एमआयडीसी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, रामा गोटे आपल्या लखनकुमार व स्वामी या साथीदारांसह इंद्राायणीनगरातील एका हॉटेलजवळ थांबले होते. त्या वेळी सहा ते सात हल्लेखोर आले. त्यांनी या तिघांवर धारदार हत्यारांनी हल्ला चढवला. हल्लेखोरांनी रामा याच्या डोक्यात दगड घातला, तर इतर दोघांवरही वार केले.
गोटे याचे येथील काही तरुणांशी शुक्रवारी भांडण झाले होते. त्याने एकाला मारहाणही केली होती. त्याचा बदला घेण्यासाठी हा खून केल्याचा संशय पोलिसांना आहे. एमआयडीसी पोलिसांनी चार हल्लेखोरांना शनिवारी रात्री अकराच्या सुमारास मोशी येथून अटक, तर एकाला रविवारी सकाळी इंद्रायणीनगरला अटक केली. एक जण फरार आहे. (प्रतिनिधी)