कुरुलकर याने परदेशात जाऊन पाकिस्तानी हेरांच्या भेटी घेतल्याचा ATS ला संशय

कुरुलकर याने देशाच्या सुरक्षेला बाधा आणणारे काही छायाचित्रे पाकिस्तानच्य ईमेल पाठवल्याचा संशयदेखील तपास यंत्रणेला आहे

पुणे : ‘डीआरडीओ’चे संचालक डाॅ. प्रदीप कुरुलकर याला पाकिस्तानातून आलेल्या ई-मेलचा सखोल तांत्रिक तपास सुरू करण्यात आला आहे. कुरुलकर याने पाकिस्तानी गुप्तचर यंत्रणेतील हेरांना संवेदनशील माहिती तसेच छायाचित्रे ई-मेलद्वारे पाठवल्याचा संशय तपास यंत्रणेला आहे. राज्य दहशतवादविरोधी विभागाच्या (एटीएस) कोठडीत असलेल्या कुरुलकरची चौकशी सुरू आहे.

कुरुलकरला अटक करण्यात आल्यानंतर एटीएसकडून करण्यात आलेल्या तपासाबाबतचा माहिती अहवाल न्यायालयात सादर करण्यात आला आहे. कुरुलकरकडे सखोल तपास करायचा असून, कुरुलकर याच्या कोठडीत वाढ करण्याची विनंती एटीएसकडून करण्यात आली होती. त्यानंतर विशेष न्यायाधीश एस. आर. नावंदर यांनी कुरुलकरवर ठेवण्यात आलेले आरोप गंभीर आहेत. या प्रकरणाचा सखोल तपास होणे गरजेचे आहे, असे निरीक्षण नोंदवून पोलिस कोठडीत १५ मेपर्यंत वाढ करण्याचे आदेश दिले.

कुरुलकरला पाकिस्तानातून काही ई-मेल पाठवण्यात आले आहेत. या ई-मेलला प्रतिसाददेखील दिलेला आहे. पाकिस्तानातील आयपी ॲड्रेसवर मेल केल्याची माहिती गुगलने दिलेल्या अहवालातून उघड झाली आहे. कुरुलकर याने देशाच्या सुरक्षेला बाधा आणणारे काही छायाचित्रे पाठवल्याचा संशयदेखील तपास यंत्रणेला आहे. त्याच्याकडून जप्त करण्यात आलेल्या लॅपटाॅप आणि मोबाइल संचाचे तांत्रिक विश्लेषण करण्यात आले असून, याबाबतचा अहवाल एटीएसला मिळाला आहे.

२०२२ मध्ये कुरुलकर याने सहा देशांना भेटी दिल्या आहेत. शासकीय पारपत्राद्वारे कुरुलकर याने परदेशात जाऊन पाकिस्तानी हेरांच्या भेटी घेतल्याचा संशय एटीएसला आहे. परदेशात कोणाची भेट घेतली याअनुषंगाने चौकशी करण्यात येत आहे.