राधाकृष्णनगरात विवाहितेची गळफास घेऊन आत्महत्या

फोटो : ११.२१ वाजेचा मेल

लोकमत न्यूज नेटवर्क

जळगाव- शहरातील दूध फेडरेशन परिसरातील राधाकृष्णनगरात राहणा-या १८ वर्षीय दुर्गा शेखर गायकवाड या विवाहितेने गळफास घेत आत्महत्या केल्याची घटना शुक्रवारी दुपारच्या सुमारास उघडकीस आली. दरम्यान, मुलीने सासरच्या त्रासाला कंटाळून आत्महत्या केल्याची तक्रार मुलीच्या वडिलांनी दिली असून त्यानुसार रात्री उशिरा शहर पोलीस ठाण्‍यात गुन्हा दाखल करण्‍यात आला आहे.

शहरातील राधाकृष्णनगरातील रहिवासी शेखर गायकवाड याचा दुर्गा हिच्याशी २३ डिसेंबर २०२० रोजी विवाह झाला होता. शुक्रवारी दुपारच्या सुमारास दुर्गाचे वडील मालवाहू रिक्षाचालक दत्तू पाटील (रा. प्रजापतनगर) यांना एका व्यक्तीचा फोन आला व तुमची मुलगी आजारी असल्याचे सांगितले. दत्तू पाटील हे भाऊ पुरुषोत्तम पाटील यांना सोबत घेऊन लागलीच मुलीचे घर गाठले. त्यावेळी त्यांना आपली मुलगी मयत स्थितीत आढळून आली. घटनेची माहिती मिळताच शहर पोलिसांनी तत्काळ घटनास्थळी धाव घेत पंचनामा करीत मृतदेह शवविच्छेदनासाठी शासकीय वैद्यकीय रुग्णालयात दाखल केला.

सहायक पोलीस अधीक्षकांची घटनास्थळी भेट

घटनेची माहिती मिळाल्यानंतर सायंकाळी सहायक पोलीस अधीक्षक कुमार चिंथा यांच्यासह शहर पोलीस ठाण्‍याचे पोलीस निरीक्षक धनराज येरुळे यांनी घटनास्थळी भेट देऊन पाहणी केली. यावेळी नातेवाइकांनी ही आत्महत्या नसून सासरच्यांच्या त्रासाला कंटाळून दुर्गा हिने आत्महत्या केल्याचा आरोप कुटुंबीयांनी केला.

गुन्हा दाखल

सासरच्यांनी दुर्गा हिच्या चारित्र्यावर संशय घेऊन तिला टोचून बोलून वारंवार शारीरिक, मानसिक छळ केला. या त्रासाला कंटाळून तिने आत्महत्या केली, अशी तक्रार मयत विवाहितेच्या वडिलांनी शहर पोलिसात दिली. त्यानुसार, मयताचा पती शेखर गायकवाड, सासू वत्सलाबाई गायकवाड, सासरा भास्कर गायकवाड, जेठ मुकेश गायकवाड (सर्व रा. राधाकृष्णनगर) यांच्याविरुद्ध रात्री उशिरा गुन्हा दाखल करण्‍यात आला आहे.