जळगावात विशाखापट्टणम येथून येतो गांजा

महिलांचाही सहभाग

ठळक मुद्देपोलीस संरक्षण मिळत असल्याचे उघडआठवड्यातून दोन दिवस येतो गांजा

जळगाव : पुरी-ओखा या एक्सप्रेसच्या वातानुकुलित बोगीत रेल्वे सुरक्षा बलाच्या पथकाने (आरपीएफ) पकडलेला सहा लाखाचा गांजा हा जळगावातील जाखनी नगर कंजरवाड्यात येत असल्याची माहिती पोलीस तपासात उघड झाली आहे. विशाखापट्टणम व ओडीसा येथून गांजा मोठ्या प्रमाणात जळगाव शहरात येत असून विशेष म्हणजे, त्याला पोलिसांचेही संरक्षण असल्याचे आरपीएफच्या निदर्शनास आले आहे.
आरपीएफच्या पथकाला १आॅक्टोबर रोजी सायंकाळी ७.४० वाजता पुरी-ओखा या एक्सप्रेसच्या बी-२ बोगीतील ३४ ते ३७ या क्रमांकाच्या आरक्षित सीटजवळ गांजाने भरलेल्या ८ बॅगा आढळून आल्या होत्या.
त्यात ३१ पॅकेटमध्ये ६५ किलो गांजा होता.
जळगाव रेल्वे स्टेशन येताच या बॅगांजवळ दोन पोलीस कर्मचारी पोहचले होते, मात्र आरपीएफचे पथक पोहचताच हे पोलीस तेथून गायब झाले होते.
गांजासोबतच्या महिला जळगावऐवजी उतरल्या नंदुरबारला
गांजाचा व्यवसाय करणाऱ्या गुन्हेगारांनी या व्यवसायात शंका येऊ नये यासाठी महिलांना पुढे केले आहे. शहरातील दोन्ही गुन्हेगार पोलिसांच्या रेकॉर्डवरील आहेत, हे विशेष. पुरी-ओखा या एक्सप्रेसमध्ये गांजा सापडल्या त्या आरक्षित सीटपासून काही अंतरावर दोन महिलाही होत्या. या दोन्ही महिला जळगाव शहरातीलच असून सुरुवातीपासून गांजासोबत होत्या.
नंतर या महिलाही तेथून गायब झाल्या, पुढे या महिला नंदुरबार येथे उतरल्याची माहिती सूत्रांनी दिली. दरम्यान, रेल्वे सुरक्षा बलाने आरक्षित सीट कोणाच्या नावाने आहे, कुठून आरक्षित केलेले आहे तसेच सुरुवातीचे सीसीटीव्ही फुटेज मिळवायला सुरुवात केली आहे.
पोलिसांना टीप दिल्यावरुन वाद
रेल्वे स्टेशनवर गांजा पकडल्यानंतर त्याच दिवशी रात्री जाखनी नगर भागात दोन गटात कडाक्याचे भांडण झाले होते. पोलिसांना टीप दिल्याच्या कारणावरुन हा वाद झाला होता, अशी माहिती सूत्रांकडून प्राप्त झाली. दरम्यान, कंजरवाड्यातूनच कारागृहात देखील गांजा पोहचविला जात असल्याची चर्चा आहे. काही महिन्यापूर्वी पोलिसांनी एका तरुणाला पकडलेही होते.
आठवड्यातून दोन दिवस येतो गांजा
विशाखापट्टणम येथून जळगावसाठी आठवड्यातून दोन दिवस एक्सप्रेस असते. रविवार व गुरुवारी या गाड्या तेथून सुटतात. विशाखापट्टणम येथील चित्तपल्ली, अंकपल्ली, मदगिरी व गाजवटा येथून हा गांजा जळगाव शहरात आणला जातो. म्हसावद (ता.जळगाव) येथील एका तरुणाला चार महिन्यापूर्वी ट्रकसह ओडिसा पोलिसांनी पकडलेले आहे. त्यात २० क्विंटल गांजा होता, आजही तो तरुण ओडिसा येथे कारागृहात आहे.