गरबा खेळून घरी परताना अल्पवयीन मुलीवर बलात्कार; ओळख लपविण्यासाठी आरोपाने कापले केस 

घटनेच्या वेळी आरोपीने अमली पदार्थाचे सेवन केले होते अशी माहिती पोलीस सूत्रांनी दिली. पीडित मुलीने दिलेल्या या माहितीच्या आधारे पोलिसांनी बुधवारी आरोपीला अटक केली.

मुंबई -  गरबा खेळून घरी परतणाऱ्या एका ११ वर्षाच्या मुलीवर टेम्पो चालकाने बलात्कार केल्याची अतिशय धक्कादायक घटना साकीनाका परिसरात घडली आहे. पीडित मुलगी आणि तिचा मित्र दोघे गरबा खेळून झाल्यानंतर घराच्या दिशेने येत असताना मंगळवारी रात्री ही लज्जास्पद घटना घडली. पोलीस आपला शोध घेत असल्याचे समजल्यानंतर आरोपी सिराज मेहंदी हसन खान (वय ३०) याने अटक टाळण्यासाठी त्याचे फॅशनेबल केसही कापले. मात्र, पोलिसांनी २४ तासांच्या आत आरोपीला त्याच्या साकीनाका येथील घरातून अटक केली. पोलिसांनी आरोपीचा मोबाइल फोन जप्त केला आहे. गुन्हा करण्यापूर्वी त्याने अल्पवयीन मुलीचे काही फोटो काढले होते.

पीडित मुलगी आणि तिचा मित्र त्यांच्या घरापासून काही अंतरावर गरबा कार्यक्रमाचे आयोजन करण्यात आले होते, तिथे गरबा खेळण्यासाठी गेले होते. पीडित मुलगी सातव्या इयत्तेत आहे. आरोपीकडे पूर्णवेळ नोकरी नव्हती. टेम्पो चालक म्हणून तो अर्धवेळ काम करायचा. घटनेच्या वेळी आरोपीने अमली पदार्थाचे सेवन केले होते अशी माहिती पोलीस सूत्रांनी दिली. पीडित मुलीने दिलेल्या या माहितीच्या आधारे पोलिसांनी बुधवारी आरोपीला अटक केली. पीडित मुलगी आणि तिच्या मित्राने आरोपीचे रेखाचित्र तयार करण्यास पोलिसांना मदत केली. आरोपीने अटक टाळण्यासाठी त्याचे केसही कापले पण आम्ही त्याला अटक केली असे पोलिसांनी सांगितले. आरोपी विरोधात कलम ३७६,३७७ अंतर्गत गुन्हा दाखल करण्यात आला आहे. पोलिसांनी या प्रकरणी सिराजसह १६ जणांना ताब्यात घेतले होते. 

50 हून अधिक टेम्पो चालकांच्या चौकशीनंतर लैंगिक शोषण करणाऱ्या नराधमास अटक