हृदयद्रावक! पत्नीचा माहेरी जाण्याचा हट्ट मुलाच्या जीवावर बेतला; पित्याने उचललं टोकाचं पाऊल

Crime News : जन्मदात्या पित्याने टोकाचं पाऊल उचललं आहे. रागाच्या भरात त्याने आपल्या 13 महिन्यांच्या मुलाला नदीत फेकून दिल्याची घटना समोर आली आहे.

नवी दिल्ली - बिहारच्या (Bihar) बेगूसरायमध्ये एक हृदयद्रावक घटना घडली आहे. पत्नीचा माहेरी जाण्याचा हट्ट मुलाच्या जीवावर बेतला आहे. जन्मदात्या पित्याने टोकाचं पाऊल उचललं आहे. रागाच्या भरात त्याने आपल्या 13 महिन्यांच्या मुलाला नदीत फेकून दिल्याची घटना समोर आली आहे. चिमुकल्याचा मृत्यू झाल्यानं परिसरात खळबळ उडाली आहे. भगवानपूर पोलीस स्टेशन हद्दीतील बनवारीपूर गावात ही संतापजनक घटना घडली आहे. मिळालेल्या माहितीनुसार, मनीष कुमार नावाच्या व्यक्तीने आपल्या मुलाला नदीत फेकून दिलं. त्यानंतर मुलाचा बुडून मृत्यू झाला. 

पोलिसांनी याप्रकरणी आरोपीला अटक केली आहे. पोस्टमॉर्टमनंतर मुलाचा मृतदेह कुटुंबीयांच्या ताब्यात देण्यात आला आहे. बनवारी पूर गावातील रहिवासी मनीष चौरसिया याचा पत्नी कांचन देवीसोबत तिच्या माहेरी जाण्यावरून वाद झाला होता. त्यानंतर आरोपीने रागात आपला 13 महिन्यांचा मुलगा शिवम कुमार याला घराजवळ असलेल्या बलान नदीमध्ये फेकून दिलं. त्यात पाण्यात बुडून शिवमचा मृत्यू झाला. त्यानंतर पोलिसांनी कारवाई करत आरोपी वडील मनीष चौरसियाला अटक केली असून त्याची चौकशी सुरू आहे.

मुलाची आई कांचन देवीने दिलेल्या माहितीनुसार, रविवारी संध्याकाळी ती तिच्या माहेरी जाण्याच्या तयारीत होती. यानंतर दारूच्या नशेत तेथे पोहोचलेल्या पतीने तिला जाण्यास नकार दिला. यावरून दोघांमध्ये भांडण झाले. यानंतर तिचा पती रागावला आणि मुलासह निघून गेला. काही वेळाने तिने पतीला मुलाबद्दल विचारले असता, तो बोटीवर फिरत असल्याचं त्यानं सांगितलं. त्यानंतर बोटीवर शोध घेऊनही शिवम कुठेच सापडला नाही, तेव्हा संशय आला. 

आजूबाजूच्या लोकांसह मुलाचा शोध घेतल्यानंतर त्याचा मृतदेह नदीत तरंगताना आढळून आला. लोकांनी याबाबतची माहिती पोलिसांना दिली आहे. पोलिसांनी घटनास्थळ गाठून आरोपीला अटक केली. त्यानंतर कठोर चौकशी केली असता त्याने मुलाला नदीत फेकून दिल्याचं सांगितले. आरोपी आणि कांचन देवी यांचा विवाह सात वर्षांपूर्वी झाल्याचं सांगण्यात येत आहे. ज्याच्यापासून त्यांना तीन मुले आहेत. पोलीस या प्रकरणाची अधिक चौकशी करत आहेत. एका हिंदी वेबसाईटने याबाबतचे वृत्त दिले आहे.