बिबट्याच्या हल्ल्यात शेतकरी जखमी

या घटनेमुळे या परिसरात दहशत पसरली असून शेतकऱ्यांमध्ये भीती व्यक्त होत असल्याने वन विभागाने त्या भागातील बिबट्याचा तातडीने बंदोबस्त करावा, अशी मागणी होत आहे.

चिखली :(बुलढाणा) : तालुक्यातील शेलोडी शेत शिवारात गव्हाच्या पिकात दबा धरून बसलेल्या बिबट्याने केलेल्या हल्ल्यात 35 वर्षीय शेतकरी गंभीर जखमी झाला आहे. ही घटना बुधवार 6 फेब्रुवारी रोजी सायंकाळी 6 वाजेच्या सुमारास घडली.

विठ्ठल तुकाराम काटे  वय 35 रा.शेलोडी असे जखमी शेतकर्‍याचे नाव असून सदर शेतकरी हे नेहमीप्रमाणे आपल्या शेतात गव्हाला पाणी देण्यासाठी गेले होते. दरम्यान, स्प्रिंकलरचा टप्पा बदलत असताना गव्हांत दबा धरून बसलेल्या बिबट्याने त्यांच्यावर अचानक हल्ला केला. बिबट्याच्या या हल्ल्यात विठ्ठल काटे यांच्या हाताला, छातीला आणि खांद्याला जबर  जखमा झाल्या आहेत.

अचानक झालेल्या या हल्ल्याचा निकराने सामना करताना काटे यांनी आरडाओरड केल्याने  आवाज ऐकून बाजूच्याच शेतातून कैलास घाटगे, हरिदास चव्हाण, एम काटे, तुळशीदास घाटगे, रवींद्र घाटगे, छडानंद घाटगे हे शेतकरी मदतीसाठी धाऊन आले  व त्यांनी आरडा-ओरड केली असता बिबट हा पळून गेला. दरम्यान जखमी शेतकरी विठ्ठल काटे यांना तातडीने चिखली येथील डॉ. विष्णू खेडेकर यांच्या रुग्णालयात उपचारासाठी भरती करण्यात आले असून प्रकृती स्थिर आहे.

या घटनेमुळे या परिसरात दहशत पसरली असून शेतकर्यामधून भीती व्यक्त होत असल्याने वन विभागाने त्या भागातील बिबट्याचा तातडीने बंदोबस्त करावा, अशी मागणी होत आहे. दरम्यान, रात्री 9 च्या सुमारास आमदार राहुल बोन्द्रे यांनी बिबट्याच्या हल्ल्यात जखमी विठ्ठल काटे यांची रुग्णालयात भेट घेऊन धीर दिला.