Navanna Purnima 2023: दसऱ्याला आपण भाताच्या लोम्ब्यांचे तोरण दाराला लावतो, त्याचा नवान्न पौर्णिमेशी काय संबंध? वाचा!

Kojagiri Purnima 2023: घरात अन्न धान्याची वाढ व्हावी म्हणून नवान्न पौर्णिमेला केले जाते नवीन धान्याचे पूजन; जाणून घ्या माहिती आणि व्रतविधी!

कोजागिरी पौर्णिमा आपण साजरी करतोच, पण नवान्न पौर्णिमा कधी असते असे विचार करत असाल तर जाणून घ्या, आश्विन महिन्यात मध्यरात्रीला असणाऱ्या पौर्णिमेला कोजागरी पौर्णिमा म्हणतात. तशी पौर्णिमा आली नाही तर दुसऱ्या दिवशीच्या पौर्णिमेला कोजागरी पौर्णिमा समजले जाते. ज्या दिवशी पौर्णिमा पूर्ण होत असेल त्या दिवशी नवान्न पौर्णिमा साजरी केली जाते. म्हणजेच २७ ऑक्टोबर रोजी कोजागिरी पौर्णिमा सुरू होत असून २८ ऑक्टोबर रोजी ती पूर्ण होणार असल्याने २८ ला कोजागिरी आणि नवान्न पौर्णिमा साजरी केली जाईल. ती का आणि कशी साजरी केली जाते तेही पाहू. 

दसऱ्याला आपण झेंडू आणि आम्रपल्लवाचे तोरण तर लावतोच, शिवाय भाताच्या लोंबी, आंब्याचे पान, कुरडूचे फूल, झेंडूचे फूल यापासून तयार केलेले तोरणही लावतो. हे तोरण प्रतीक असते नवान्न पौर्णिमेला केल्या जाणाऱ्या नवधान्याच्या पूजेचे! 

गणपतीनंतर कमी कालावधीत तयार होणाऱ्या पिकांची कापणी केली जाते. भात हे त्यापैकी एक धान्य! नवरात्रीत नुकताच कापणी करून आलेला भात जेवणात घेण्यापूर्वी किंवा बाजारात विकायला नेण्यापूर्वी देवाला त्याच तांदुळाचा भात किंवा खीर असा नैवेद्य केला जातो. त्याची पूजा केली जाते. म्हणून दसऱ्यालाही भाताच्या लोम्बी तोरणात अडकवून ते वैभवाचे प्रतीक म्हणून वापरले जाते. 

कोजागिरीला आपण लक्ष्मीची, चंद्राची तर पूजा करतोच, पण नवान्न पौर्णिमेच्या निमित्ताने पूजा करायची ती माता अन्नपूर्णेची, कारण तीच आपल्याला धन धान्य देते. तिच्या कृपेने सर्वांना सुख समृद्धी प्राप्त होउदे, हीच प्रार्थना करायची.