'देशात शंभर टक्के भाजपाचेच सरकार येणार', परळीतील बुलेट रॅलीत पंकजा मुंडेंचा विश्वास

मोटरसायकल कार्यकर्त्यांच्या रॅलीत 'फिर मोदी को लाना है, देश को बचाना है' गाण्याने उत्साह संचारला

बीड - जिल्ह्यातील परळी येथे राज्याच्या ग्रामविकास आणि महिला बालविकास मंत्री पंकजा मुंडे व खा डॉ. प्रितम मुंडे यांच्या प्रमुख उपस्थितीत भाजपच्या वतीने मोटार सायकलवर 'विजयी संकल्प रॅली' काढण्यात आली. या रॅलीनंतर जनतेला संबोधित करताना, पंकजा मुंडेंनी केंद्रात 100 टक्के भाजपाचेच सरकार येणार असल्याचे म्हटले. तसेच पंतप्रधान नरेंद्र मोदींनी गोरगरीबांसाठी खूप काम केलयं. त्यामुळे संपूर्ण जनमत भाजपच्या बाजूने असल्याचेही पंकजा यांनी म्हटले.  

केंद्र व राज्य सरकारने जनहितासाठी केलेल्या कामा विषयी जनजागृती करण्याच्या उद्देशाने जिल्हयातील प्रत्येक विधानसभा मतदारसंघात भाजपच्या वतीने विजयी संकल्प रॅली काढण्यात आली. परळी शहरात पालकमंत्री ना पंकजा मुंडे व खा. डॉ. प्रितम मुंडे यांच्या प्रमुख उपस्थितीत या रॅलीचे आयोजन करण्यात आले होते. रविवारी सायंकाळी 4.30 वा. गोपीनाथ गडावरील गोपीनाथ मुंडे यांच्या समाधीचे दर्शन घेवून ही रॅली मार्गस्थ झाली. या रॅलीत मतदारसंघातील भाजपचे गावोगांवचे हजारो कार्यकर्ते आपल्या मोटरसायकलसह उत्स्फूर्तपणे सहभागी झाले होते. गोपीनाथ गड येथून निघालेली ही रॅली तळेगांव, टोकवाडी, डॉ. शामाप्रसाद मुखर्जी उड्डाण पूल, आर्यसमाज, राणी लक्ष्मीबाई टॉवर, गणेशपार, अंबेवेस, तळ, पुन्हा टॉवर, स्टेशन रोड, एक मिनार चौक, बस स्टँड, योगेश गार्डन, ना. पंकजा मुंडे यांचे कार्यालय, शिवाजी चौक, वडार कॉलनी मार्गे वैद्यनाथ मंदिर येथे आली व त्याठिकाणी रॅलीचा समारोप झाला. 

नागरिकांकडून भव्य स्वागत 

गोपीनाथ गड ते वैद्यनाथ मंदिर मार्गावर ठिक ठिकाणी रस्त्यावर नागरिकांनी रॅली थांबवून फटाक्यांच्या आतिषबाजीत भव्य स्वागत केले. रॅलीविषयी जनतेच्या मनात असलेली कमालीची उत्सुकता यावेळी दिसून आली. पालकमंत्री ना. पंकजा मुंडे व खा. डॉ. प्रितम मुंडे यांनी खुल्या जीपमधून नागरिकांना हात उंचावून अभिवादन करत त्यांचे स्वागत स्विकारले. रॅलीत अग्रभागी सुरू असलेल्या 'फिर मोदी को लाना है, देश को बचाना है' या गाण्याने सर्वत्र उत्साह संचारला होता. विशेष म्हणजे वाहतुकीच्या नियमांचे पालन करत रॅलीचा थाटात समारोप झाला. 

पुन्हा भाजपचेच सरकार येणार 

या विजयी संकल्प रॅलीने कार्यकर्त्यांमध्ये प्रचंड उत्साह व जोश भरला आहे. पंतप्रधान नरेंद्र मोदी यांनी गोरगरीब जनतेसाठी काम केले असून विविध विकास योजना त्यांच्यासाठी राबविल्या आहेत, संपूर्ण जनमत सध्या भाजपच्या बाजूने असल्याने केंद्रात पुन्हा भाजपचेच सरकार शंभर टक्के येणार आहे असा विश्वास पालकमंत्री ना पंकजाताई मुंडे यांनी कार्यकर्त्यां समोर बोलतांना व्यक्त केला. दरम्यान, खा. डाॅ. प्रीतमताई मुंडे यांच्या उपस्थितीत आज बीड व गेवराई येथे विजयी संकल्प रॅली मोठ्या उत्साहात पार पडली. 

आज परळी शहरात भाजपच्या वतीने भव्य 'विजयी संकल्प रॅली' काढण्यात आली. हजारो मोटरसायकलसह भाजपचे पदाधिकारी व कार्यकर्ते या रॅलीत उत्स्फूर्तपणे सहभागी झाले होते. ' फिर मोदी को लाना है, देश को बचाना है ' या गाण्याने सर्वत्र उत्साह संचारला होता. #BJPVijaySankalpBikeRally@BJP4Indiapic.twitter.com/KpNkdfyhza

— PankajaGopinathMunde (@Pankajamunde) March 3, 2019