अभियंत्यास मारहाण प्रकरण; शिवसेना जिल्हाप्रमुखावर गुन्हा दाखल प्रकरणात गृहराज्यमंत्री केसरकर अकोल्यात

रस्त्याचे काम पूर्ण झाल्यानंतरही पैसे मिळत नसल्यामुळे शाखा अभियंता किशोर राऊत यांनी कंत्राटदाराचे देयक थांबविल्याने शिवसेनेचे जिल्हाप्रमुख नितीन देशमुख व कंत्राटदाराने शाखा अभियंता राऊत यांना बेदम मारहाण केली होती.

अकोला- रस्त्याचे काम पूर्ण झाल्यानंतरही पैसे मिळत नसल्यामुळे शाखा अभियंता किशोर राऊत यांनी कंत्राटदाराचे देयक थांबविल्याने शिवसेनेचे जिल्हाप्रमुख नितीन देशमुख व कंत्राटदाराने शाखा अभियंता राऊत यांना बेदम मारहाण केली होती. याप्रकरणी राऊत यांच्या तक्रारीवरून सिटी कोतवाली पोलिसांनी शिवसेनेच्या जिल्हा प्रमुखांसह कंत्राटदारावर शासकीय कामात अडथळा आणणे व मारहाण केल्याप्रकरणी  ६ डिसेंबर रोजी गुन्हा दाखल केला आहे.  याबाबत शिवसेनेने रोष व्यक्त होत असतानाच आता गृहराज्यमंत्री दिपक केसरकर हे अकोल्यात दाखल होत आहेत. ते पोलिस अधिक्षकांची भेट घेऊन या प्रकरणातील तथ्य जाणून घेणार असल्याने पुढे काय होते याकडे राजकीय क्षेत्राचे लक्ष लागले आहे.

जिल्हा परिषदेचे शासकीय कंत्राटदार अक्षय कुलकर्णी यांनी गत तीन महिन्यांपूर्वी एका रस्त्याचे काम पूर्ण केले आहे. या रस्त्याचे काम पूर्ण झाल्यानंतर कंत्राटदाराने देयक शाखा अभियंता किशोर राऊत यांच्याकडे सादर केले. त्यानंतर वारंवार पाठपुरावा केला. मात्र शाखा अभियंता राऊत यांच्याकडून सकारात्मक प्रतिसाद मिळाला नाही. या प्रकारामुळे कंत्राटदार कुलकर्णी हतबल झाल्यानंतर त्यांनी हा प्रकार शिवसेनेचे जिल्हाप्रमुख नितीन देशमुख यांना सांगितले. त्यानंतर जिल्हाप्रमुख देशमुख हे कंत्राटदाराला सोबत घेऊन शाखा अभियंता किशोर राऊत यांच्या दालनामध्ये गेले. यावेळी त्यांना देयकाबाबत विचारणा केली असता, राऊत यांनी समाधानकारक उत्तर न दिल्याने देशमुख यांचा पारा चढला. शाखा अभियंता व जिल्हाप्रमुख यांच्यात शाब्दीक वाद झाल्यानंतर जिल्हाप्रमुख देशमुख यांच्याशी मग्रुर भाषेत संवाद साधणाºया राऊत यांच्यावर शिवसैनिकांनी हात उगारला. या घटनेनंतर शाखा अभियंता राऊत यांनी जिल्हाप्रमुख नितीन देशमुख, कंत्राटदार अक्षय कुलकर्णी यांच्या विरोधात शिवीगाळ करून जिवे मारण्याची धमकी दिल्याची तक्रार पोलिसात दिली. या तक्रारीवरून पोलिसांनी सदर दोघांविरुद्ध ३५३,३३२, ३४ नुसार गुन्हा दाखल केला आहे. तर दूसरीकडे   शाखा अभियंता किशोर राऊत याने शासकीय कंत्राटदार अक्षय कुळकर्णी यांच्या खिशातील पाच हजार रुपये बळजबरी हिसकावल्याने त्याच्याविरुद्ध सिटी कोतवाली पोलीस ठाण्यात लुटमारीचा गुन्हा दाखल करण्यात आला आहे. 

सदर कंत्राटदाराकडून तब्बल ७५ हजार रुपये उकळल्यानंतरही अभियंता राऊत याने पैशाची मागणी सुरूच ठेवल्याचे तक्रारीत नमूद आहे.या प्रकरणी कुळकर्णी यांनी  ७ डिसेंबर रोजी पोलीस ठाण्यात तक्रार दिली. पोलिसांनी शाखा अभियंता किशोर राऊत याच्याविरुद्ध भांदवि कलम ३९२ नुसार गुन्हा दाखल केला आहे. शाखा अभियंता राऊतला अटक करण्यात आलेली नसून, पोलीस त्याचा शोध घेत आहेत.