अज्ञात वाहनाच्या धडकेने युवक जखमी

डिझेल चोरी करणाऱ्याला रंगेहाथ पकडले

वणी: येथील लालपुलिया परिरसरात ट्रकमधील टाकीतून डिझेल चोरताना एकाला रंगेहात पकडून पोलिसांच्या हवाली करण्यात आले. ही घटना रविवारी सायंकाळी ५ वाजताच्या सुमारास घडली. उत्तराकुमार बरतीया ठाकूर असे आरोपीचे नाव असून तो छत्तीसगड राज्यातील बेनेतरा येथील रहिवासी आहे. राजकुमार सुरेश जयस्वाल यांनी त्याला ट्रकमधून डिझेल चोरताना रंगेहात अटक केली.

विचित्र अपघात तीन किरकोळ जखमी

वणी : वणी-घुग्गूस मार्गावरील लालगुडा गावाजवळ तीन वाहनांचा एकाचवेळी विचित्र अपघात झाला. त्यात तीनजण किरकोळ जखमी झाले तर तीनही वाहनांचे मोठे नुकसान झाले. ही दुर्घटना रविवारी सायंकाळी ५ वाजताच्या सुमारास घडली.

कोळसा खाली करून वणीकडे भरधाव येत असलेल्या ट्रकने दोन वाहनांना धडक दिली. या अपघातामुळे ट्रकचालकाचे ट्रकवरील नियंत्रण सुटल्याने त्याने अगोदर घुग्गुसवरून वणीकडे येणाऱ्या एमएच ३४ बीआर ८६८८ क्रमांकाच्या कारला धडक देत रोडचे दुभाजक पार करून वणीवरून उकणीला जात असलेल्या एमएच ४० वाय ८१६३ या पिकअप वाहनाला जोरदार धडक दिली. या अपघातात कारमध्ये बसलेल्यांना दुखापत झाली नसली तरी कारचे मात्र मोठे नुकसान झाले. कारला धडक दिल्यानंतर ट्रकचालकाने राज्य महामार्गावरील दुभाजक पार करून विरुद्ध दिशेने येणाऱ्या पिकअप वाहनाला धडक देत पिकअप वाहनासह ट्रकही रोडच्या खाली उतरला. हे पिकअप वाहन उकणीला जात होते. पिकअपचेही मोठे नुकसान झाले असून पिकअपमधील तीनजण जखमी झाले आहेत. या अपघाताचा तपास वणी पोलीस करत आहेत.

साथीचे आजार रोखण्यासाठी फवारणीची मागणी.

मारेगाव : अर्धा अधिक पावसाळा संपत आला असून गेल्या पंधरा दिवसांपासून तापमानात वाढ झाल्याने आजार वाढत आहेत. असे असताना शहरासह ग्रामीण भागात अस्वच्छता आहे. घरी शौचालय असताना तालुक्यातील ग्रामीण भागासह शहरातसुद्धा नागरिक उघड्यावरच शौचासाठी जात आहेत. या अस्वच्छतेमुळे आजाराला आमंत्रण मिळत आहे.त्यामुळे जंतूनाशक औषधांची फवारणी करण्यात यावी, अशी मागणी होत आहे.

मारेगाव तालुक्यात बोगस डॉक्टराची चलती

मारेगांव : येथील ग्रामीण रुग्णालयात मागील अनेक वर्षांपासून डॉक्टर व कर्मचाऱ्यांची अनेक पदे रिक्त असल्याने तालुक्यात एकमेव असलेले हे रुग्णालय सलाईनवर आहे. रुग्णालयात गेलेल्या रुग्णाला बहुतांशवेळी रेफर केल्या जाते. त्यामुळे गोरगरीब जनतेच्या आरोग्याचा प्रश्न गंभीर झाला आहे. त्याचा नेमका फायदा तालुक्यात बोगस डॉक्टरांनी उचलला असून तालुक्यात शहरासह ग्रामीण भागात या बोगस डॉक्टरांनी आपली दुकानदारी थाटली आहे. रुग्णांवर अघोरी उपचार होत असल्याने अनेकांचे आरोग्य धोक्यात आले आहे. त्यामुळे बोगस डॉक्टरांवर कार्यवाही करावी, अशी मागणी होत आहे.