यवतमाळात दहा देशी पिस्तूल जप्त, सात आरोपी अटकेत

यवतमाळ व पुसदमध्ये स्थानिक गुन्हे शाखेच्या पथकाने दहा देशी पिस्तूल, १६ जिवंत काडतुसं जप्त केली असून, या प्रकरणी सात आरोपींना अटक करण्यात आली आहे.

यवतमाळ : जिल्ह्यात यवतमाळ व पुसदमध्ये स्थानिक गुन्हे शाखेच्या पथकाने दहा देशी पिस्तूल, १६ जिवंत काडतुसं जप्त केली असून, या प्रकरणी सात आरोपींना अटक करण्यात आली आहे. आरोपींमध्ये अमरावती, अकोल्यातील युवकांचा समावेश असल्याची माहिती जिल्हा पोलीस अधीक्षक एम. राज कुमार यांनी सोमवारी येथे पत्रकार परिषदेत दिली. ऐन दुर्गोत्सव काळात अतिसंवेदनशील पुसद शहरातून तब्बल नऊ देशी पिस्तूल आढळून आल्याने पोलीस दलात खळबळ निर्माण झाली आहे. दुर्गा विसर्जनादरम्यान कुठे घातपाताची, सामाजिक शांततेला आव्हान देण्याची ही तयारी तर नव्हे ना, या दृष्टीनेही पोलीस तपास करीत आहे. अकोल्याचा अभिजित ऊर्फ पिंटू रामभाऊ जगताप (रा. झोडगा, ता.बार्शी टाकळी) हा पुसदमध्ये देशी पिस्तूलची विक्री करण्यासाठी येणार असल्याची टीप स्थानिक गुन्हे शाखेला मिळाली. यावरून पोलीस उपनिरीक्षक संतोष मनवर, नीलेश शेळके पथकासह चार दिवसांपासून पुसदमध्ये ठाण मांडून होते.ठरल्यानुसार अभिजित हा देशी पिस्तूल घेऊन पुसदच्या उमरखेड मार्गावरील श्रीराम पार्कमध्ये रविवारी आला. तेथे चौघात पिस्तूल विक्रीचा व्यवहार सुरू असतानाच सापळा लावून असलेल्या पोलिसांनी त्यांच्यावर झडप घातली. अभिजित जगताप शिवाय जय केशव बाबर (३०) रा.शिवाजी वॉर्ड पुसद, राकेश शरदसिंग बयास (३८) रा.नवीन पुसद, लिलाधर ऊर्फ बबलू विजय मळघने (२१) रा.मरसूळ ता.पुसद या चौघांना ताब्यात घेण्यात आले. त्यांच्याकडून देशी बनावटीच्या नऊ पिस्टल, १६ जिवंत काडतूस आणि चार मोटरसायकली असा सात लाख २६ हजाराचा मुद्देमाल जप्त करण्यात आला. या प्रकरणी पुसद शहर ठाण्यात आर्मअ‍ॅक्टचा गुन्हा दाखल केला. आरोपींना चार दिवसांची पोलीस कोठडी सुनावण्यात आली. तत्पूर्वी शुक्रवारी टोळीविरोधी पथकाने यवतमाळातील आरटीओ आॅफिस परिसरातून एक देशी पिस्तूल व दोन जिवंत काडतूस जप्त केले. यात तीन जणांना अटक केली. अजहर ऊर्फ आझाद खान वाहीद खान पठाण ऊर्फ बाबा पटेल (३३) रा.झेंडा चौक दिग्रस, शाहेजाद खान शब्बीर खान (२५) रा.गुलिस्तानगर अमरावती, जावेद अहमद खुर्शिद अहमद (३३) रा.बाबा ले-आऊट, यवतमाळ अशी आरोपींची नावे आहे. अजहर हा सराईत गुन्हेगार आहे. त्यांच्याकडून एक लाख ३२ हजाराचा मुद्देमाल जप्त केला. यवतमाळ शहर पोलीस ठाण्यात गुन्हा नोंदविण्यात आला असून आरोपींची तीन दिवसांची पोलीस कोठडी घेण्यात आल्याचे एसपी एम राज कुमार यांनी सांगितले. पत्रपरिषदेला अपर पोलीस अधीक्षक अमरसिंह जाधव, एलसीबीचे प्रमुख मुकुंद कुलकर्णी, पोलीस उपनिरीक्षक संतोष मनवर उपस्थित होते. या कारवाईत स्थानिक गुन्हे शाखेतील सहायक फौजदार नीलेश शेळके, ऋषी ठाकूर, संजय दुबे, योगेश गटलेवार, साजीद शेख, अमोल चौधरी, किरण श्रीरामे, आशीष गुल्हाने, विनोद राठोड, प्रवीण मेंगर, आकाश सहारे, श्रीधर शिंदे, जयंत शेंडे, यशवंत जाधव, गौरव ठाकरे, नीलेश पाटील यांनी सहभाग घेतला. स्वसंरक्षणासाठी पिस्तूल खरेदीपुसदमध्ये नऊ देशी पिस्टलसह अटक करण्यात आलेले सर्व आरोपी चांगल्या कुटुंबातील व आर्थिकदृष्ट्या संपन्न आहे. प्रत्येकाचा स्वतंत्र व्यवसाय आहे. केवळ स्वसंरक्षणासाठी हे पिस्टल खरेदी केल्याची कबुली आरोपींनी दिली. यापूर्वी त्यांच्यावर इतर कुठलेही गुन्हे नसल्याचे सांगण्यात आले. पिस्तूल तस्करीचे तार मध्य प्रदेशातजिल्ह्यात लगतच्या मध्य प्रदेशातून देशी पिस्टल पुरविले जाते. यापूर्वीही फेब्रुवारी महिन्यात टोळीविरोधी पथकाने आठ पिस्टल पकडले होते. त्यात मध्य प्रदेशातील आरोपींना अटक केली होती. पुसदच्या प्रकरणातही मध्य प्रदेशाच्या बैतुल जिल्ह्यातील तार जुळले असल्याचे सांगण्यात येत आहे.