पांढरकवडा (यवतमाळ) : गडचांदूर येथून पांढरकवडाकडे जाणाऱ्या दुचाकीला मागून भरधाव येणाऱ्या ट्रकने जोरदार धडक दिल्याने झालेल्या अपघातात पती - पत्नी दोघेही ठार झाल्याची हृदयद्रावक घटना गुरुवारी दुपारी २ वाजता घडली. गोकुळदास शामराव लांडगे (६०), सुनीता गोकुळदास लांडगे (५२) अशी मृतांची नावे आहेत.
आपल्या भाच्याकडील वाढदिवसाच्या कार्यक्रमासाठी गडचांदूर येथील गोकुळदास लांडगे हे त्यांची पत्नी सुनीतासह एमएच ३४ डीएक्स ६७३९ क्रमांकाच्या दुचाकीने गडचांदूरहून पांढरकवडाकडे जात होते. दरम्यान, राष्ट्रीय महामार्गावरील करंजी येथील उड्डाणपुलावरून जात असताना मागून भरधाव वेगाने येणाऱ्या यूपी ९२ टी ३५६९ क्रमांकाच्या ट्रकने दुचाकीला जोरदार धडक दिली.
या धडकेत गोकुळदास लांडगे हे जागीच ठार झाले. गंभीर अवस्थेत असलेल्या त्यांची पत्नी सुनीता लांडगे यांना करंजी येथील महामार्ग पोलिस मदत केंद्राच्या पोलिसांनी तातडीने पांढरकवडा येथील रुग्णालयात नेले. परंतु उपचारादरम्यान त्यांचा मृत्यू झाला. हा अपघात एवढा भीषण होता की, घटनास्थळावर रक्ताचा सडा पडला होता. काही वेळेपर्यंत नागपूर - हैदराबाद हा राष्ट्रीय महामार्ग बंद झाला होता. त्यानंतर पोलिसांनी वाहतूक सुरळीत केली.