सुरेंद्र राऊत,यवतमाळ: झरी तालुक्यातील मुकुटबन येथील सिमेंट रस्ता बांधकामाची निविदा प्रक्रिया सुरू आहे. या संदर्भातील कागदपत्रांची पडताळणी सार्वजनिक बांधकाम विभागातील अधीक्षक अभियंता यांच्या कार्यालयात केली जात आहे. हे कंत्राट मिळविण्यासाठी कंत्राटदाराने थेट अधीक्षक अभियंता व कार्यालयातील इतर अधिकारी, कर्मचाऱ्यांना धमक्या देणे सुरू केले. तसेच जाब विचारला असता अश्लील शिवीगाळ केली. या प्रकरणी अधीक्षक अभियंता यांच्या तक्रारीवरून यवतमाळ शहर पोलिसांनी कंत्राटदाराविरुद्ध गुन्हा दाखल केला आहे.
प्रवीण उंबरकर (५०) रा. वणी असे आरोपी कंत्राटदाराचे नाव आहे. अधीक्षक अभियंता संभाजी धोत्रे यांनी तक्रार दिली. त्यावरून कलम ३५३, ५०४, ५०६ भादंविनुसार गुन्हा करण्यात आला आहे. ८ डिसेंबर रोजी सायंकाळी ६ वाजता प्रवीण उंबरकर हे अधीक्षक अभियंत्याच्या कक्षात पोहोचले. तेथे त्यांनी विनापरवानगी जाऊन टेबलावरील फाईल फेकण्याचा प्रयत्न केला. त्यांना विरोध केला असता अधीक्षक अभियंत्याला धक्का देत अश्लील भाषेत शिवीगाळ करुन जीवे मारण्याची धमकी दिली.
त्यानंतर रात्री ९ वाजता पुन्हा मोबाईलवर संपर्क करून धमकाविण्याचा प्रयत्न केला. इतर कंत्राटदार यांच्याकडे अधीक्षक अभियंता संभाजी धोत्रे याला संपवितो, त्याच्या सोलापूर येथील निवासस्थानी १०० वर माणसांना पाठवितो, ती त्याला सोडणार नाही, माझा भाऊ मोठा राजकीय नेता आहे, अशा स्वरूपाच्या धमक्या दिल्याचे तक्रारीत नमूद आहे. प्रवीण उंबरकर याच्यापासून जीविताला धोका असल्याचेही अधीक्षक अभियंता यांनी तक्रारीत नमूद केले आहे. त्यावरून गुन्हा दाखल झाला आहे.