येथून जवळच असलेल्या चेतन सेवांकुर निवास येथे नगर परिषद अग्निशमन दलाचे प्रमुख दिनकर सुरोशे यांचा शुक्रवारी सत्कार करण्यात आला.
केकतउमरा येथील चेतन सेवांकुर या नेत्रहीन मुलांच्या निवासालगत असलेल्या सामाजिक वनीकरणच्या जमिनीत भीषण आगीची घटना घडली होती. सदर घटनेच्या दिवशी आगीची माहिती मिळताच नगरपालिका अग्निशमन दलाचे प्रमुख दिनकर सुरोशे यांनी त्वरित आपल्या ताफ्यासह घटनास्थळी पोहोचून आग आटोक्यात आणण्यात यश मिळविले होते. सुरोशे यांच्या तत्पर कार्य कुशलतेमुळे जीवितहानी टळून नेत्रहीन कलावंताचे निवास सुरक्षित राहिले होते. त्यामुळे त्यांचा हा सत्कार करण्यात आला. केकतउमरा ग्रामपंचायतचे सरपंच वंदना संजय ठोंबरे व माजी उपसरपंच तथा विद्यमान ग्रामपंचायत सदस्य किशोर घुगे यांच्या हस्ते शाल व स्मृती चिन्ह प्रदान करून त्यांचा गौरव करण्यात आला. यावेळी चेतन सेवांकुरचे सर्व नेत्रहीन कलावंत उपस्थित होते.