काही दिवसांपूर्वी दोन चिमुकल्या मुलींना मदतीचा हात हवा असल्याचे आवाहन सामाजिक कार्यकर्ते यांनी सोशल मीडियातून केले होते. प्रसारमाध्यमांनीही दखल घेऊन सेवाभावींनी वडिलांचे छत्र आणि आईच्या मायेची सावली नसलेल्या अशोकनगर वस्तीतील त्या मुलींना मदतीचे आवाहन केले होते. या आवाहनानंतर काही सेवाभावींनी मदतही केली. चिमुकल्या मुलींना मदतीची गरज असल्याचे कळताच कारंजा येथील रहिवाशी असलेले बिरसा क्रांती दल वाशिमचे राजेश मस्के यांनी गहू घेऊन थेट मंगरुळपीरला त्या कुटुंबीयांना देण्यासाठी पोहोचले, तसेच आपले सहकारी असलेल्या शिक्षक मित्रांनीही त्या कुटुंबीयांची भेट घेण्याविषयी चर्चा केली. लगेच सहकाऱ्यांच्या हाकेला ओ देत मंगरुळपीरचे गटशिक्षणाधिकारी सुभाष पवने यांनीही हजेरी लावून त्या मुलींची आस्थेने विचारपूस केली आणी रोख मदतही केली. यावेळी केंद्रप्रमुख, जि. प. सदस्य चिंतामण खुळे, सुदाम भोडने, जीवन हगवणे, जामदरा येथील कैलास ढोके, इरफान शेख, धम्मा कांबळे, राजेश मस्के आदींची उपस्थिती होती.
००००००००००००
आठवीपर्यंतच्या शिक्षणाची सोय
अशोकनगर येथील डाके कुटुंबांतील चिमुकल्या मुलींना केवळ आर्थिक मदतच दानशूरांनी केली नाही, तर आठवीपर्यंत त्या मुलींचे मोफत शिक्षणाची सोय लावून शैक्षणिक साहित्यही पुरविण्याचा संकल्पही गटशिक्षणाधिकारी सुभाष पवने यांच्यासह इतर शिक्षकांनी केला आहे, तसेच सर्व शिक्षकांनी या चिमुकल्या मुलींना मदत करण्यासाठी पुढाकार घ्यावा, असे आवाहनही केले.