शिरपूर जैन (वाशिम) : मालेगाव तालुक्यातील शिरपूर जैन येथे घरगुती गॅस सिलिंडरने अचानक पेट घेतल्याने त्यात एक जण जखमी झाल्याची घटना १४ मार्च रोजी सकाळी ११ वाजताच्या दरम्यान घडली. नागरिकांच्या सतर्कतने मोठा अनर्थ टळला.
शिरपूर जैन येथील भरवस्तीत असलेले संतोष शेंडे यांच्या घरामध्ये नेहमीप्रमाणे गॅसशेगडी सुरु करण्यासाठी गेले असता सिलिंडरने अचानक पेट घेतला. सदर बाब शेंडे यांनी आजुबाजुला सांगितल्याने एकच धावपळ झाली. सिलिंडरने घेतलेला पेट थांबविण्यापर्यंत घरातील अनेक वस्तु जळून खाक झाल्या होत्या. आग विझविताना यामध्ये योगेंद्र किसन शेंडे यांचा हात जळाल्याने ते जखमी झालेत. त्यांना उपचारासाठी अकोला येथे पाठविण्यात आले आहे.तसेच मदन शेंडे नामक युवकही किरकोळ जखमी झाला. आग विझविण्यासाठी संजय विश्वंभर, पवन महाजन्, शोहेब यांच्यासह परिसरातील ग्रामस्थांनी सहकार्य केले. तसेच घटनेची माहिती पोलीसांना कळताच घटनास्थळी सहायक पोलीस निरिक्षक संजय शिपणे व त्यांच्या सहकारी पोहचले.
शोहेबचे धाडस
शेंडे यांच्या घरातील सिलिंडरने पेट घेतल्याने एकच धांदल उडाल्याने काय करावे कोणालाच सुचत नसताना गावातील शोहेब नामक युवकाने पोते ओले करुन सिलिंडरवर फेकले.तसेच अग्निरोधक यंत्राचा वापर करीत आग विझविण्यासाठी घरात प्रवेश करुन ते विझविण्याचा प्रयत्न केला. त्याच्या धाडसाचे सर्वत्र कौतूक होत आहे.