संतोष वानखडे
वाशिम : स्वच्छता ही सेवा या अभिनव मोहीमेअंतर्गत जिल्हा परिषदेच्या पाणी व स्वच्छता विभागाकडून १ ऑक्टोबर रोजी जिल्ह्यातील ६७५ गावांमध्ये स्वच्छतेबाबत सकाळी ८ ते ११ या वेळेत श्रमदान करण्यात आले.
राज्याचे मुख्यमंत्री एकनाथ शिंदे यांनी १ ऑक्टोबर रोजी संपूर्ण राज्यातील गाव, तालुका व पंचायत समिती स्तरावर कचरामुक्तीसाठी श्रमदान कार्यक्रम राबविण्याची सूचना केली होती. त्याची प्रभावी अंमलबजावणी म्हणून जिल्हा परिषदेचा पाणी व स्वच्छता विभागाने शनिवारी ( दि.३० ) चोख नियोजन केले. श्रमदान करण्याबाबत गावपातळीवरील सर्व प्रशासकीय यंत्रणेला सूचना दिल्या होत्या. रविवारी ग्रामीण भागात सकाळपासूनच स्वच्छता मोहिम राबविण्यात आली. यामध्ये शाळकरी मुलांचा सहभागही घेण्यात आला.
शहरांमध्येही स्वच्छतेचा जागर !वाशिम, रिसोड, मालेगाव, कारंजा, मंगरूळपीर व मानोरा या प्रमुख सहा शहरांमध्ये तहसिल, न.प. मुख्याधिकारी, लोकप्रतिनिधी, सामाजिक कार्यकर्त्याच्या उपस्थितीत स्वच्छता मोहिम राबविण्यात आली. वाशिम शहरात विद्यार्थ्यानी रॅली काढून स्वच्छतेचा जागर केला.