वाशिम : पिकांचे नैसर्गिक आपत्ती, कीड आणि रोगराईमुळे नुकसान झाल्यास पिकांना संरक्षण म्हणून प्रधानमंत्री पीक विमा योजनेंतर्गत १४ जुलैपर्यंत जिल्ह्यातील ७५४२६ शेतकऱ्यांनी पीक विमा उतरविला आहे. १५ जुलै अंतिम मुदत असून, मुदतवाढ मिळेल की नाही? याकडे शेतकऱ्यांचे लक्ष लागून आहे.
नैसर्गिक आपत्ती, किडीमुळे पिकांचे नुकसान झाल्यास शेतकऱ्यांना आर्थिक नुकसानीला सामोरे जावे लागते. नुकसानभरपाई मिळावी याकरिता प्रधानमंत्री पीक विमा योजनेंतर्गत पिकांना संरक्षण देण्यात येते. मात्र, जाचक अटी असल्याचे कारण समोर करून अनेक शेतकरी पीक विमा योजनेकडे पाठ फिरवीत असल्याचे दिसून येत आहे. या योजनेत शेतकऱ्यांचा अधिकाधिक सहभाग लाभावा याकरिता जनजागृती करण्यात आली. अनेक ठिकाणी बँक, सामूहिक सुविधा केंद्र, कृषी केंद्र तसेच ग्रामपंचायतीच्या दर्शनी भागात या योजनेचे पोस्टरही लावण्यात आले. तथापि, शेतकऱ्यांचा उत्स्फूर्त प्रतिसाद लाभला नसल्याचे दिसून येते. १४ जुलैपर्यंत ४१७६ कर्जदार आणि ७१२५० बिगर कर्जदार अशा एकूण ७५४२६ शेतकऱ्यांनी पीक विमा उतरविला आहे. विमा उतरविण्यासाठी १५ जुलै अंतिम मुदत आहे. १५ जुलैनंतर मुदतवाढ मिळण्याची शक्यता वर्तविण्यात येत आहे.
000०००
कर्जदार शेतकरी ४१७६
बिगर कर्जदार शेतकरी ७१२५०
विमा संरक्षित क्षेत्र ५५४३९
शेतकऱ्यांची विमा रक्कम ४.८३ कोटी
राज्य सरकारची विमा रक्कम १३.२९ कोटी
केंद्र सरकारची विमा रक्कम १३.२९ कोटी
००००
कोट
प्रधानमंत्री पिक विमा योजनेंतर्गत १५ जुलैपर्यंत शेतकऱ्यांना पीक विमा उतरविता येणार आहे. १४ जुलैपर्यंत जिल्ह्यातील ७५ हजार ४२६ शेतकऱ्यांनी विमा उतरविला आहे. या योजनेत अधिकाधिक शेतकऱ्यांनी सहभागी व्हावे.
- शंकर तोटावार
जिल्हा अधीक्षक कृषी अधिकारी, वाशिम