मंगेश कराळे
नालासोपारा :- कामावरून घरी जाणाऱ्या एका ६५ वर्षीय महिलेला भरधाव वेगातील XUV 500 ने जोरदार धडक दिल्याने तिचा जागीच मृत्यू झाल्याची घटना शनिवारी संध्याकाळी अर्नाळा राजोडी रस्त्यावर घडली आहे. या घटनेनंतर संतप्त जमावाने त्या गाडीची तोडफोड केली आहे. या घटनेची माहिती मिळताच अर्नाळ्याचे सहायक पोलिस निरीक्षक रुपेश दळवी पोलीस कर्मचाऱ्यांसोबत पोहचून जमावाला शांत केले. अर्नाळा पोलिसांनी फेटलचा गुन्हा दाखल करून एकाला ताब्यात घेतले आहे.
शनिवारी संध्याकाळी सातच्या सुमारास मथुरा दयात (६०) आणि नवशी बसवंत (६५) या दोघीही कामावरून घरी राजोडी ते सत्पाळा रोडने चालत चालल्या होत्या. त्यावेळी एका भरधाव XUV 500 च्या गाडीने रस्त्याच्या कडेने चालणाऱ्या नवशी यांना जोरदार धडक दिल्याने डोक्याला गंभीर दुखापत झाल्याने त्यांचा जागीच मृत्यू झाला आहे. या घटनेनंतर संतप्त जमावाने गाडीतील चालकाला बेदम मारहाण करून गाडीची तोडफोड केली. मृत महिला नवशी या सत्पाळा नाका ग्रामपंचायत कार्यालयामागे राहत होती. मुळची ही महिला डहाणू तालुक्यातील मुरबाड पोस्ट वैती येथील असून पोटाची खळगी भरण्यासाठी ती वेठबिगारी मजूर म्हणून काम करण्यासाठी वसईत आली होती.
मृत महिलेचा मृतदेह अर्नाळा पोलिसांनी पंचनामा करून ताब्यात घेऊन विरारच्या ग्रामीण रुग्णालयात शवविच्छेदनासाठी पाठवला आहे. याबाबत अर्नाळा पोलीस ठाण्यात महिलेच्या मृत्यूस कारणीभूत ठरल्याप्रकरणी चालक कुलदीप मिश्रा याच्याविरोधात सदोष मनुष्यवधाचा गुन्हा दाखल करून त्याला अटक केली आहे.