वसई-विरार महानगरपालिकेने येत्या १ जूनपासून महिलांना बस भाड्यात ५० टक्के सवलत देण्याचा निर्णय घेतला. ही योजना राबविण्यासाठी आवश्यक असलेल्या सर्व प्रशासकीय मार्गदर्शक तत्त्वे जारी करण्यात आली, अशी माहिती वसई-विरार महापालिकेचे आयुक्त अनिल कुमार पवार यांनी दिली. वसई-विरार महानगरपालिका अंतर्गत कूण १३० बस चालतात. यापैकी ९० बस कंत्राटदारांमार्फत चालवल्या जातात. तर, उर्वरित ४० बस महानगरपालिकेद्वारे चालवल्या जातात. या बस वसई-विरार परिसरातील ३७ प्रमुख मार्गांवर धावतात.
"काही इतर नागरी वाहतूक सेवा महिलांना तिकीट भाड्यात सवलत देत आहेत. महिलांना बसमध्ये ५० टक्के सवलत देण्याच्या राज्य सरकारच्या धोरणानुसार आम्ही १ जूनपासून महिलांना अर्ध्या दराने तिकिटे देण्याचा निर्णय घेतला आहे," असे अनिल कुमार पवार म्हणाले.
वसईच्या आमदार स्नेहा दुबे पंडित यांनी अधिकारी आणि मंत्र्यांची भेट घेऊन आणि व्हीव्हीएमसी बसमध्ये महिलांना भाडे सवलत देण्याचा मुद्दा उपस्थित केला होता. त्यानंतर हा निर्णय घेण्यात आला. महानगरपालिकेच्या बसमधून प्रवास करताना महिलांना भाड्यात सवलत देणे, हे महिला सक्षमीकरणाच्या दिशेने एक महत्त्वाचे पाऊल आहे. या सवलतीचा फायदा या भागातील हजारो महिला प्रवाशांना होईल, ज्या दररोज काम, शिक्षण आणि इतर महत्त्वाच्या कामांसाठी सार्वजनिक वाहतुकीवर अवलंबून असतात.
या उपक्रमामुळे केवळ आर्थिक दिलासा मिळणार नाही तर, महिलांचा प्रवास अधिक सुरक्षित आणि सुलभ होईल. स्थानिक नागरिक आणि सामाजिक संघटनांनी महानगरपालिकेच्या या निर्णयाचे स्वागत केले आणि त्याची प्रभावी अंमलबजावणी सुनिश्चित करावी अशी मागणी केली आहे, जेणेकरून सर्व पात्र महिलांना कोणत्याही अडथळ्याशिवाय त्याचा लाभ मिळू शकेल.