मंगेश कराळे
नालासोपारा :- वाहन चोरी करणाऱ्या सराईत आरोपीला अटक करण्यात आचोळे पोलिसांना यश मिळाले आहे. या आरोपीकडून चोरीच्या ७ रिक्षा, १ दुचाकी आणि १ मोबाईल असा एकूण ५ लाख ५० हजारांचा मुद्देमाल हस्तगत करत ८ गुन्ह्यांची उकल केल्याची माहिती जनसंपर्क अधिकारी व सपोनि शिवकुमार गायकवाड यांनी सोमवारी दिली आहे.
एव्हरशाईन सिटी येथील इंद्रपुरम रेसॉर्ट अपार्टमेंटमध्ये राहणाऱ्या धर्मेंद्र कनोजिया (३४) यांची रिक्षा चोरीला गेली होती. ३० मे रोजी रात्री विनाडायनास्टी सोसायटीच्या बाहेर मोकळ्या जागेत पार्किंग केलेली रिक्षा चोरीला गेली होती. आचोळे पोलिसांनी ४ जून रोजी वाहन चोरीचा गुन्हा दाखल केला होता. मिरा भाईंदर वसई विरार पोलीस आयुक्तालयाच्या परिसरात रिक्षा चोरीच्या गुन्ह्यात मोठ्या प्रमाणात वाढ झाल्याने या गोष्टीचे गांभीर्य लक्षात घेवून वरिष्ठांनी गुन्ह्यांची उकल करून आरोपींना अटक करण्याचे आदेश आचोळे पोलिसांना दिले होते. दिलेल्या सूचना व आदेशान्वये आचोळे गुन्हे प्रकटीकरण शाखेच्या पोलीस अधिकारी व अंमलदारांनी गुन्ह्याचे तांत्रिक विश्लेषनाद्वारे व सीसीटीव्ही फुटेजच्या आधारे चोरट्यांचा शोध घेत होते.
५ जूनला रात्री गुन्हे प्रकटीकरण शाखेचे अधिकारी व अंमलदार हे नालासोपारा पूर्वेकडील फारब्रिगेड नाका येथे गस्त करत होते. त्यावेळी एक संशयित चोरी झालेली रिक्षा चालवून जाताना दिसला. त्या रिक्षाचा पोलिसांनी पाठलाग करून संशयिताला ताब्यात घेतले. त्याला या रिक्षाबद्दल विचारणा केल्यावर त्याने उडवाउडवीची उत्तरे देऊ लागला. त्यानंतर पोलिसांनी त्याला आचोळे पोलीस ठाण्यात घेऊन गेले. त्याने शशिकांत कामनोर (२४) असे नाव सांगितले. त्याच्याकडून चोरीची ही रिक्षा जप्त केली. पोलीस कस्टडीमध्ये तपास व सखोल चौकशी करून आरोपीकडून चोरीच्या ७ रिक्षा, १ दुचाकी आणि १ मोबाईल असा एकूण ५ लाख ५० हजारांचा मुद्देमाल हस्तगत करत ८ गुन्ह्यांची उकल केली आहे. यापूर्वीही आरोपीवर ७ गुन्हे दाखल आहेत.
सदरची कामगिरी पोलीस उपायुक्त पौर्णिमा चौगुले श्रींगी, सहाय्यक पोलीस आयुक्त उमेश माने-पाटील यांचे मार्गदर्शनाखाली आचोळ्याचे वरिष्ठ पोलीस निरीक्षक सुजितकुमार पवार, गुन्हे प्रकटीकरण पथकाचे सपोनि यशपाल सुर्यवंशी, पोउनि मंगेश वडणे, सफौ दत्तात्रय दाईंगडे, पोहवा शंकर शिंदे, निखील चव्हाण, विनायक कचरे, आमोल सांगळे, मोहनदास बंडगर, गोविंद गट्टे आणि अमोल बरडे नेम. पोलीस उप आयुक्त कार्यालय परिमंलड वसई यांनी केली आहे.