मीरारोड : भाईंदर पूर्वेच्या गोल्डन नेस्ट पोलीस चौकी जवळील सावरकर चौकात भरधाव ट्रक खाली दुचाकी वरील दोघे मित्र सापडून दोघांचा मृत्यू झाला. नवघर पोलिसांनी गुन्हा दाखल करून ट्रक चालकास अटक केली आहे. आझाद नगरमध्ये राहणारे अब्रारअली अन्वरअली मणियार (२२) व त्याचा भाउ इस्तियाक व त्याचे मित्र आणि तुफेल समिम शहा ( २५ ) हे मीरारोडच्या रसाज चित्रपट गृहात गुरुवारी रात्रीचा चित्रपट पाहण्यास गेले होते. चित्रपट संपल्यावर अब्रारअली व तुफेल हे दोघे मित्र एका दुचाकी वरून परत येत होते .
रात्री साडे आकराच्या सुमारास नया नगरच्या लोढा संकुल मार्गावरून दोघे दुचाकी वरून आझादनगर कडे येताना स्वातंत्र्यवीर सावरकर चौकात काशीमीरा कडून फाटकच्या दिशेला ट्रक चालला होता . समोर भरधाव ट्रक पाहून वेगात असलेल्या दुचाकीचा तुफेल याने ब्रेक दाबला . त्यामुळे दुचाकी घसरून दुचाकीसह दोघेही ट्रकच्या खाली सापडले .
दोघेही ट्रकच्या चाका खाली सापडल्याने मदतीसाठी धावून आलेल्या लोकांनी स्टेफनी लावून चाक वर केली आणि दोघांना बाहेर काढले . त्यांना रुग्णालयात उपचारासाठी नेले असता डॉक्टरांनी दोघांचा आधीच मृत्यू झाल्याचे सांगितले. या प्रकरणी अब्रारअलीचा भाऊ मझहरअली च्या फिर्यादी वरून नवघर पोलिसांनी ट्रकचालक विरुद्ध शुक्रवार २७ जानेवारी रोजी गुन्हा दाखल केला आहे. ट्रक चालकाला पोलिसांनी अटक केली आहे.