(मंगेश कराळे)
नालासोपारा : शहरात राहणाऱ्या आठ वर्षीय बालिकेची हत्या केल्याची घटना समोर आली आहे. वसई फाटा येथील वाण्याचा पाडा, जिल्हा परिषद शाळेजवळ राहणाऱ्या विजय रामायण साह यांची आठ वर्षाची मुलगी चांदणी साह हिची हत्या करण्यात आली आहे. सोमवारी सकाळी तिचा मृतदेह घराजवळील एका बैठ्या चाळीच्या रूममध्ये प्लास्टिकच्या गोणीमध्ये हात पाय बांधलेल्या अवस्थेत सापडून आला होता. मृत चांदणी ही शुक्रवारी संध्याकाळपासून घराजवळून बेपत्ता झाली होती. याबाबत तिचे वडील विजय साह यांनी पेल्हार पोलीस ठाण्यात मुलीच्या अपहरणाची तक्रार दाखल केली होती.
परिसरात चांदणीच्या फोटोचे पोस्टर लावून तिचा सर्वत्र शोध सुरू होता. सोमवारी सकाळी चांदणी राहत असलेल्या घराजवळील एका बैठ्या चाळीतील पाच नंबर रूममधून कुजल्याचा वास येत असल्याने स्थानिकांनी रुमचे दार उघडले असता आतमध्ये हातपाय बांधलेल्या अवस्थेत प्लास्टिकच्या गोणीमध्ये कोंबलेला तिचा मृतदेह आढळून आला. याबाबत माहिती मिळाल्यावर पेल्हार पोलिसांनी घटनास्थळी धाव घेत मृतदेह पंचनामा करून शवविच्छेदनासाठी मुंबईतील रुग्णालयात पाठविला आहे. या प्रकरणी पोलिसांकडून हत्येचा गुन्हा दाखल करण्याची प्रक्रिया सुरू असल्याची माहिती पेल्हार पोलिसांकडून देण्यात आली आहे. मृत चांदणी ही नजीकच्या मराठी शाळेत तिस-या इयत्तेत शिकत आहे. या बालिकेची हत्या ही कोणी केली याचा पोलीस शोध घेत आहेत.