लोकमत न्यूज नेटवर्क
नालासोपारा : अभिनेत्री तुनीषा शर्मा मृत्यू प्रकरणात आता नवे वळण आले आहे. तुनीषाची आई वनिता शर्मा हिने शिजान खानवर ड्रग्स घेतल्याचा आणि तिला उर्दू शिकवल्याचा गंभीर आरोप केला आहे. तिच्या मोलकरणीने तुनीषाची आईदेखील शिजानच्या घरी ये-जा करत असल्याचे पोलिसांना सांगितल्याचे सूत्रांकडून कळते. दरम्यान, वालीव पोलिसांनी शिजानच्या मैत्रिणीचीही चौकशी केली असून तुनीषाच्या मृत्यूप्रकरणी वालीव पोलिसांनी आतापर्यंत २१ जणांचे जबाब नोंदवले आहेत.
तुनीषाच्या घरी घरकाम करणारी बाई आणि आईच्या दाव्यामुळे नवे वळण आले आहे. तुनीषाच्या आईने शिजान ड्रग्ज घेत असल्याचा आरोप केला आहे. तसेच शिजानला भेटल्यानंतर तुनीषाची जीवनशैली बदलली होती. तिने हिजाब घातला होता आणि शिजान तिला उर्दू शिकवत होता. तिच्या मृत्यूनंतर शिजानने तिला मदत केली नाही. मात्र, तो किती दिवसांपासून ड्रग्ज घेत होता, याची माहिती नसल्याचेही तिने सांगितले आहे. पोलिसांच्या चौकशीत अभिनेत्रीच्या घरी काम करणाऱ्या मोलकरणीने ते दोघे त्यांच्या लग्नाची तयारी करत होते. इतकेच नाही तर तुनीषा आणि शिजान एकमेकांच्या घरी ये-जा करायचे. दोघे ४ ते ६ दिवस एकमेकांच्या घरी राहिले होते. तुनीषाची आई वनिताही शिजान खानच्या घरी जायची, असा दावा केल्याचे पोलिस सूत्रांकडून कळते. पोलिसांनी शिजानच्या मैत्रिणीची केली चौकशी आहे.
वनिता यांनी यापूर्वीही शिजानवर अनेक मुलींशी संबंध असल्याचा आरोप केला आहे. व्हॉट्सॲप चॅट्समधून पोलिसांना शिजानच्या गुप्त मैत्रिणीबद्दल माहिती मिळाली. आता पोलिसांनी तिचीही चौकशी केल्याचे कळते. मात्र, ही गर्लफ्रेंड कोण आहे, याबाबत कोणतीही माहिती समोर आलेली नाही. शनिवारी तुनीषाने मेकअप रूममध्ये पंख्याला लटकून आत्महत्या करण्यापूर्वी शिजानने या गुप्त मैत्रिणीशी दोन तास बोलणे केल्याची माहिती पोलिस सूत्रांकडून कळते.
व्हॉट्सॲप चॅट्स शिजानने केले डिलीट
वालीव पोलिसांनी तीन फोन जप्त केले आहेत. यापैकी तुनीषाचा मोबाइल अद्याप अनलॉक झालेला नाही. पोलिसांनी शिजानच्या फोनवरील व्हॉट्सॲप चॅट्सवरून अडीचशे ते तीनशे पानांची फाइल तयार केली आहे. तुनीषा आणि शिजान, शिजान आणि तुनीषाची आई यांच्यात चॅट झालेले आहेत. यामध्ये शिजानचे त्याच्या अन्य मैत्रिणीशी झालेल्या चॅटचाही समावेश आहे.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"