- आशिष राणे
वसई : वसई -विरार शहरात रविवारी सर्वाधिक रेकोर्ड ब्रेक 303 कोरोनाने बाधित रूग्ण आढळून आले असून शहरात दिवसेंदिवस कोरोना बाधित रूग्ण वाढत असल्याने आता पालिका हद्दीतील एकूण कोरोना बाधितांची रुग्ण संख्या आता 3 हजार 550 वर पोहचली आहे, तर दिवसभरात 72 रुग्णाना वसईतील विविध रुग्णालयातून मुक्त देखील करण्यात आल्याची माहिती पालिकेने दिली आहे.
दरम्यान रविवारी वसई विरार महापालिका हद्दीत सर्वाधिक असे 303 कोरोना बाधित रूग्ण आढळून आले आहेत. यामध्ये वसई- 81 नायगाव -17 वसई-विरार- 22 नालासोपारा-143 आणि विरार- 40 अशा एकूण 303 रुग्णाचा अंतर्भाव आहे. तर पालिका हद्दीत रविवारी एकाही रुग्णाचा मृत्यू न झाल्याने आता वसई -विरार मध्ये कोरोनाने आजवर मयत झालेल्या रुग्णाची एकूण संख्या आता 105 इतकी झाली आहे . तर आतापर्यंत शहरात विविध रुग्णालयात एकूण 1741 रुग्ण कोरोना वर उपचार घेत आहेत.
एकूणच शहरात वर्दळ वाढत असतांना दिवसेंदिवस कोरोना बाधित रुग्णाची देखील संख्या वाढती असल्याने ही बाब पालिकेच्या दृष्टीने महाचिंतेची बनून राहिली आहे.
दिलासादायक! वसई विरार शहरात 72 रूग्ण घरी परतले
वसई विरार मनपा हद्दीत रविवारी विविध रुग्णालयात उपचार घेत असलेले असे 72 रूग्ण आपापल्या घरी परतले त्यामुळे आता मुक्त रुग्णाची एकुण संख्या 1704 वर पोहचली आहे.