- मंगेश कराळेनालासोपारा - २९ वर्षीय महिलेच्या गळ्यावर चाकूने वार करून हत्या केलेला मृतदेह बंद घरात सापडल्याने नालासोपारा शहरात खळबळ माजली आहे. सदर हत्या झालेल्या महिलेच्या एका पायाचे दोन तुकडे झाल्याचेही सूत्रांकडून कळते. तुळींज पोलिसांना माहिती मिळताच घटनास्थळी धाव घेऊन पंचनामा करत मृतदेह ताब्यात घेतला आहे. तुळींज पोलिसांनी हत्येचा गुन्हा दाखल करून ही हत्या कोणी व का केली याचा तपास आता पोलीस करत आहे.
शहरातील नागिनदास पाडा येथील दत्त निवास चाळीतील घराच्या मालकाला बंद खोलीतून दुर्गंधी येत होती. त्यानंतर त्यांनी संशयावरून तत्काळ तुळींज पोलीस ठाण्यात माहिती दिली. पोलिसांनी घराची पाहणी केली असता एक महिला रक्ताच्या थारोळ्यात जमिनीवर पडलेली दिसून आली. सप्तशीला सावंत (२९) असे या हत्या झालेल्या महिलेचे नाव आहे. परंतु मृतदेहाची स्थिती अशी होती की ओळख पटवणे कठीण होते. ही महिला लिव्ह अँड रिलेशनशिपमध्ये राहत असल्याचे सूत्रांकडून कळते. ज्या घरात मृतदेह आढळून आला ते घर फेब्रुवारी महिन्यात एका महिलेला भाड्याने देण्यात आल्याची माहिती घरमालकांकडून देण्यात आली. सध्या पोलिसांनी मृतदेह ताब्यात घेऊन पोस्टमार्टमसाठी पाठवला आहे.