- मंगेश कराळे
नालासोपारा - घरफोडी व चोरी करणाऱ्या आरोपीला अटक करण्यात वसईच्या गुन्हे प्रकटीकरण पथकाला यश मिळाले आहे. आरोपीकडून ६ गुन्ह्यांची उकल करून काही मुद्देमाल हस्तगत केल्याची माहिती जनसंपर्क अधिकारी विशाल धायगुडे यांनी दिली आहे.
बाभोळा येथील पुष्कर अपार्टमेंटमध्ये राहणाऱ्या समिता विश्वास मोरे यांच्या घरी १७ जुलैला संध्याकाळी चोरट्यांनी चांदीचे दागिने चोरी करून नेले होते. याप्रकरणी वसई पोलिसांनी गुन्हा दाखल केला होता. मागील काही दिवसामध्ये वसई पोलीस ठाण्याच्या हद्दिमध्ये घरफोडी व चोरीच्या गुन्हयांमध्ये वाढ झाली होती. सदर गुन्हयांना आळा घालून दाखल गुन्हयांची लवकरात लवकर उकल करण्यासाठी वरिष्ठांनी गुन्हे प्रकटीकरण पथकातील अधिकारी व अंमलदार यांना सुचना व मार्गदर्शन केले होते. त्याअनुषंगाने दोन पथके तयार करुन गुन्हयाचा तपास चालू होता. तपासादरम्यान मिळालेल्या गुप्त बातमी व तांत्रिक विश्लेषणाद्वारे आरोपी राकेश राजेश मस्तान याला ताब्यात घेतले. आरोपीकडे तपास केल्यावर आरोपीने नमुद गुन्हा केल्याचे निष्पन्न झाल्याने त्याला अटक केली आहे. त्याच्याकडे केलेल्या तपासा दरम्यान त्याने वसई व माणिकपुर पोलिस ठाणे कार्यक्षेञात ६ गुन्हे केल्याचे निष्पन्न झाले. त्याच्याकडून चांदीचे दागिने, मोबाईल, लॅपटॉप, टॅब, कॅमेरा असा ६९ हजार रुपये किमतीचा मुद्देमाल हस्तगत केला आहे.
सदरची कामगिरी पोलीस उपायुक्त पौणिमा चौगुली-श्रींगी, सहाय्यक पोलीस आयुक्त पद्मजा बढे यांचे मार्गदर्शनाखाली वसईचे वरिष्ठ पोलीस निरीक्षक रणजित आंधळे, पोलीस निरिक्षक (गुन्हे) ऋषिकेश पवळ, गुन्हे प्रकटीकरण पथकाचे सहाय्यक पोलीस निरीक्षक राम सुरवसे, सुनिल पवार, पोलीस हवालदार सुनिल मलावकर, मिलींद घरत, सुर्यकांत मुंढे, अक्षय नांदगावकर यांनी केलेली आहे.