मंगेश कराळे
नालासोपारा - विरारमध्ये राहणारे आयर्नमॅन हार्दिक पाटील यांनी १७ वी 'कॅलिफोर्निया आयर्नमॅन स्पर्धा २०२२' यशस्वीरित्या नुकतीच पार केली आहे. यात महत्वाची बाब म्हणजे मागील आठवड्यामध्येच नेदरलँड देशातील अँमस्टरडॅम येथे पार पडलेली 'टीसीएस पूर्ण मॅरेथॉन स्पर्धा' देखील त्याने एक दोन वेळा नव्हे तर तब्बल नव्यांदा पूर्ण केली आहे. मागील दोन आठवड्यांमध्ये १७ वी कॅलिफोर्निया आयर्नमॅन स्पर्धा २०२२ तसेच टीसीएस पूर्ण मॅरेथॉन स्पर्धा यांमध्ये आयर्नमॅन हार्दिकने चमकदार कामगिरी केली आहे. हार्दिकच्या या कामगिरीबद्दल विरार-वसईकरांसह संपूर्ण महाराष्ट्राची मान अभिमानाने उंचावली गेली आहे. त्याचे या कामगिरीचे सर्व स्तरावरून कौतुक केले जात आहे.
फुल आयर्नमॅन ही वर्ल्ड ट्रायथलॉन कॉर्पोरेशन (डब्ल्यूटीसी) द्वारे आयोजित ट्रायथलॉन रेस आहे. यात ४ किमी पोहणे, १८०.२ किमी सायकल चालवणे आणि ४२.२ किमी धावणे यांचा समावेश असतो. या तिन्ही शर्यती क्रमाने आणि ब्रेकशिवाय पूर्ण करायच्या असतात. १७ तासांच्या कालावधीत ही आव्हाने सर करावी लागतात.
यापूर्वी वसई तालुक्यासह पालघर, ठाणे जिल्ह्यामध्ये आपल्या प्रोफेशनल बॉडी बिल्डिंगच्या माध्यमातून हार्दिकने ज्युनिअर महाराष्ट्र श्री व सिनियर श्री यामध्ये प्रथम क्रमांक मिळवून नाव कमावले आहे. २०१५ मध्ये पहिल्यांदाच फुल आयर्नमॅनचा किताब पटकावून त्याने आपली घोडदौड सुरु केली होती. हार्दिकने चार वेळा इंडिया बुक ऑफ रेकॉर्ड तसेच चार वेळा वर्ल्ड रेकॉर्ड इंडिया आणि तीन वेळा एशिया बुक ऑफ रेकॉर्डमध्ये आपल्या विक्रमांच्या नोंदी नोंदविल्या आहेत. आजवर त्याने शिकागो, न्यूयॉर्क, टोकियो, बोस्टन, लंडन, न्यूझीलँड, मेक्सिको, डेन्मार्क, तैवान, अमेरिका, ऑस्ट्रेलिया या देशात जाऊन स्पर्धा पूर्ण केल्या आहेत.
स्पोर्टसमध्ये करीयर करणाऱ्यांसाठी फिटनेसचा कानमंत्र म्हणून आर्यनमॅन हार्दिकने सांगितले की, स्पोर्टस असो अथवा इतर कोणतही क्षेत्र असो, कितीही व्यस्त असाल तरी दिवसातला किमान एक तास तरी फिटनेससाठी द्या. कोणतही यश मिळवण्यासाठी सातत्य, मेहनत, जिद्द आणि आपला फोकस किती महत्वाचा आहे हे देखील त्याने विशेष नमूद केले आहे. तसेच आपल्या 'आयर्न फिटनेस' क्लबच्या माध्यमातून पालघर जिल्ह्यातुन सक्षम असलेले आयर्नमॅन घडवण्यासाठी लागणार ट्रेनिंग आणि फायनान्सची व्यवस्था करणार असून, 'आयर्नमॅन फिटनेस क्लब' जॉइंट करण्याचे आवाहन आर्यनमॅन हार्दिकने तरुणांना केले आहे.