लोकमत न्यूज नेटवर्क
मीरारोड - महापालिकेने इमारतीची बांधकाम परवानगी रद्द करून सदनिका नोंदणीकृत करू नये असे कळवून देखील विकासकाने सदनिका विकल्या व नोंदणी केल्या प्रकरणी वादग्रस्त रवी बिल्डर, तत्कालीन जिल्हा सह निबंधक अश्या एकूण ७ जणांवर काशीमीरा पोलिसांनी गुन्हा दाखल केला आहे .
मीरारोडच्या विजयपार्क भागात राहणारे फिर्यादी अजेंद्र जोशी हे खाजगी शिकवणी घेतात तर पत्नी अश्मी ह्या शिक्षिका आहे . फेसबुकवर २०२१ साली ४८ लाखात २ बीएचके फ्लॅटची जाहिरात पाहून त्यांनी एजंट मार्फत गौरव व्हॅली येथील गौरव ऍस्टर ह्या रवी बिल्डरच्या इमारतीत ४६ लाख १० हजार देऊन फ्लॅट खरेदी केला .
जोशी हे फ्लॅटची पाहणी करण्यासाठी इमारतीत गेले असता काही जणां कडून माहिती मिळाली कि , महापालिका आयुक्तांनी जून २०१९ मध्ये इमारतीची बांधकाम परवानगी रद्द केल्याचे समजले . तसेच नागरिकांची फसवणूक होऊ नये म्हणून सदर इमारतीतील सदनिकांची नोंदणी करू नये असे पत्र सह जिल्हा निबंधक यांना आयुक्तांनी दिले होते . तरी देखील जोशी यांना सदनिका विकली व नोंदणीकृत करून दिली .
१ जुलै रोजी जोशी यांच्या फिर्यादी वरून त्यांना सदनिका विकून फसवणूक केल्या प्रकरणी बिल्डर रवी शाह , केतन ठोकरशी , सोनल शाह , सेल्स व्यवस्थापक रवींद्र राणा , अधिकारपत्र धारक मच्छिन्द्र सामंत , वास्तुविशारद अनिष अँड असोसिएट्स व तत्कालीन सह जिल्हा निबंधक यांच्यावर गुन्हा दाखल करण्यात आला आहे . पोलीस पुढील तपास करत आहेत . रवी बिल्डर हा वादग्रस्त असून त्याच्या वर अनेक गुन्हे व तक्रारी दाखल आहेत .