पाच लाखांची थकबाकी: गावकऱ्यांना मिळाल्या नोटीसवडनेर : करवसुलीकरिता अकार्यक्षम ठरलेल्या वडनेर ग्रामपंचायतने दोन वर्ष पूर्वीपर्यंतच्या घर तसेच इतर थकीत करवसुलीसाठी लोक अदालतीत धाव घेतली आहे. यात हिंगणघाट तालुका विधी सेवा समितीमार्फत गावाकऱ्यांना नोटीसी बजावण्यात आल्या आहेत. यामुळे गावात चांगलीच खळबळ माजली आहे.हिंगणघाट तालुक्यातील वडनेर ग्रामपंचायत अंतर्गंत रहिवासी तसेच इतर कर अशी एकूण पाच लाख रुपये थकलेले आहे. थकीत करापोटी ग्रामपंचायतला भार असह्य झाल्याने ग्रापंचायतने एका ठरावांतर्गत करवसुलीकरिता लोक अदालतीत कर धारकांना खेचले आहे. सुमारे ३०० प्रकरणे तालुका विधी सेवा समितीकडे न्यायप्रविष्ठ करण्यात आली आहेत. यामध्ये ग्रामपंचायतने दाखल केलेल्या प्रकरणामध्ये थकीत नसलेल्या तसेच केवळ वर्षाकाठी थकीत कर असलेल्या रहिवाशांना सुद्धा नोटीस पाठविण्यात आल्याने ग्रामपंचायतच्या कारभाराबाबत ग्रावकऱ्यांत असंतोष पसरला आहे. ग्रामपंचायतमध्ये कार्यरत ग्रामविकास अधिकारी यांनी लोक अदालतीत प्रकरण न्यायप्रविष्ठ करण्यापूर्वी कुठलीही शहानिशा न करता केवळ ग्रामपंचायत पदाधिकाऱ्यांच्या सांगण्यावरून आणि राजकीय सूड भावनेतून काही गावकऱ्यांना विनाकारण त्रास देत असल्याचा आरोप गावकरी करीत आहेत.(वार्ताहर)
करवसुलीसाठी वडनेर ग्रामपंचायत लोकअदालतीत
By admin | Updated: December 11, 2014 23:10 IST