वर्धा : राज्य परिवहन महामंडळाच्या कामगारांनी वेतन कराराच्या मागणीसह विविध मागण्यांसाठी शुक्रवापासून (8 जून) बेमुदत संप सुरू केला आहे. आंदोलनकर्त्या कामगारांच्या मागण्यांवर योग्य तोडगा न काढण्यात आल्याने शनिवारी दुस-याही दिवशी आंदोलन सुरूच आहे. आंदोलनादरम्यान अवघ्या 24 तासात रापमच्या वर्धा विभागात दीड शतकाहून अधिक बस फे-या रद्द झाल्याने या विभागाचे सुमारे सव्वा सहा लाखांचे नुकसान झाले आहे.
जिल्ह्यात रापमचे वर्धा, पुलगाव, आर्वी, हिंगणघाट व तळेगाव असे पाच आगार आहेत. या पाचही आगारातून दररोज सुमारे ३५९ बस फे-यांचे नियोजन केले जाते. संपाच्या पहिल्या दिवशी केवळ अल्प मनुष्यबळामुळे अनेक बसफे-या रद्द झाल्या होत्या. या संपात रापमचे वाहक व चालकांसह कर्मचारी मोठ्या संख्येने सहभागी झाल्याने रापमच्यावतीने देण्यात येणारी वाहतूक सेवा संपाच्या दुस-या दिवस असलेल्या शनिवारी प्रभावित झाल्याचे दिसून आले.
(ST कर्मचाऱ्यांना संपाचा फटका, पगारात झालेली वाढ सरकार रद्द करणार?)
शुक्रवारी दुपारी १२ वाजेपर्यंत ७६ बस फे-या रद्द झाल्या होत्या. तर शनिवारी दुपारी १२ वाजता केवळ १८८ फे-या सोडण्यात आल्याचे रापमच्या अधिका-यांनी सांगितले. रापम कामगारांच्या या आंदोलनादरम्यान जिल्ह्यातील रापमच्या पाचही आगारात कुठलाही अनुचित प्रकार घडू नये म्हणून पोलिसांचा कडेकोट बंदोबस्त लावण्यात आला होता. पोलिसी बंदोबस्तातच रापमच्या वर्धासह पुलगाव, आर्वी, हिंगणघाट व तळेगाव आगारातून बसेस सोडल्या जात होत्या. सदर संपामुळे काही प्रमाणात नागरिकांसह प्रवाशांना अनेक अडचणींचा सामनाच करावा लागला.
आंदोलन तीव्र होण्याचे संकेत
रापमच्या कामगारांनी आपल्या विविध मागण्यांच्या पूर्ततेसाठी शुक्रवारपासून संप पुकारला असला तरी या संपात कामगार संघटने संपूर्ण तर एमएमकेचे काहीच पदाधिकारी व कार्यकर्ते सहभागी झाल्याने पाहिजे तशी रापमची वाहतूक सेवा प्रभावित झालेली नाही. आंदोलनाच्या दुस-याही दिवशी संबंधितांनी आंदोलनकर्त्यांच्या मागण्यांवर विचार न केल्याने शनिवारी विविध संघटनेच्या पदाधिका-यांनी चर्चा केली. येत्या काही तासात मागण्यांवर समाधानकारक तोडगा न काढण्यास इतर संघटनाही या संपात सहभागी होणार असल्याचे बोलले जात आहे. यामुळे हे आंदोलन पुढील काही दिवसात तीव्र होण्याची शक्यता कर्मचा-यांकडून वर्तविला जात आहे.
आंदोलनात सहभागींचा मागविला अहवाल
बेमुदत संपामुळे रापमची प्रवासी वाहतूक सेवा विस्कळली आहे. या संपाचा सर्वसामान्य नागरिकांसह प्रवाशांना चांगलाच त्रास सहन करावा लागत आहे. रापम कर्मचा-यांनी सुरू केलेले आंदोलन गैरकायदेशीर असल्याचा ठपका ठेवत जिल्ह्यातील पाचही आगारातून सदर संपात कोणकोण सहभागी आहे याचा अहवाल रापमच्या विभाग नियंत्रण कार्यालयाने मागवला आहे. तो अहवाल प्राप्त होताच त्यावर काय कार्यवाही केली जाणार, याकडे सा-यांचेच लक्ष लागले आहे.