वर्धा : पाच दिवसांपासून घरातून बेपत्ता असलेल्या युवकाने गळफास घेत आत्महत्या केल्याची धक्कादायक माहिती सोमवारी ५ रोजी सकाळच्या सुमारास उजेडात आली. ही घटना हिंदीविश्व विद्यालयाच्या पडीक जागेवर सम्राटनगर परिसरात घडली. याप्रकरणी पोलिसांनी आकस्मिक मृत्यूची नोंद घेतली.
अमन काळसर्पे (२१) रा. बालाघाट ह.मु. वर्धा असे मृतक युवकाचे नाव आहे. मृतक अमन हा मजुरीचे काम करीत होता. तो ३१ ऑगस्ट रोजीपासून घरातून बेपत्ता होता. त्याच्या नातलगांनी याबाबत रामनगर पोलिसात २ राेजी मिसिंग तक्रार दाखल केली होती. तेव्हापासून त्याचा शोध पोलीस घेत होते. मात्र, सोमवारी ५ रोजी शेळ्या चारण्यास गेलेल्या व्यक्तीला दुर्गंधी आल्याने त्याने पडीक जागेची पाहणी केली असता एका युवकाचा मृतदेह झाडाला दोरीने बांधलेल्या अवस्थेत दिसून आला. त्याने तत्काळ याबाबतची तक्रार रामनगर पोलिसांना दिली.
सहाय्यक पोलीस निरीक्षक विजय चन्नोर यांनी कर्मचाऱ्यांना घेत घटनास्थळ गाठून झाडाला लटकलेला मृतदेह उत्तरिय तपासणीसाठी सामान्य रुग्णालयात पाठविला. तो मृतदेह अमन काळसर्पे याचाच असल्याची ओळख पटल्याने मृतदेह नातेवाईकांच्या स्वाधीन करण्यात आला. मृतक अमनची मानसिक स्थिती काही दिवसांपासून बिघडल्याने त्याने आत्महत्येसारखे टोकाचे पाऊल उचलल्याचा प्राथमिक अंदाज रामनगर पोलिसांनी वर्तविला आहे. याप्रकरणी पोलिसांनी आकस्मिक मृत्यूची नोंद घेतली आहे.