वर्धा : पीडित महिलेवर स्वत:च्याच घरात बळजबरीने अत्याचार करून त्याचा व्हिडीओ तयार करून सोशल मीडियावर पोस्ट करण्याची धमकी दिल्याचा प्रकार हिंगणघाट शहरात ३ रोजी गुरुवारी उघडकीस आला. या घटनेने शहरात एकच खळबळ उडाली असून, पोलीस आरोपीचा शोध घेत आहेत.
आरोपी प्रवीण बाकडे (रा. इंदिरा गांधी वॉर्ड) याला पैशाची आवश्यकता असल्याने त्याने त्याच्या ओळखीतील ३० वर्षीय महिलेला दोन लाख रुपयाची मागणी केली होती. महिलेने गरज लक्षात घेता स्वत:चा २२ ग्रॅम वजनाचा सोन्याचा नेकलेस पतीला न विचारता आरोपी प्रवीणला मदत म्हणून दिला होता. आरोपीने तो नेकलेस महिलेला परत न केल्याने पीडित महिलेने त्याला जून २०२१ मध्ये नेकलेस परत देण्याची मागणी केली होती. आरोपी प्रवीण याने पीडितेला नेकलेस देण्याच्या बहाण्याने घरी बोलाविले.
पीडिता प्रवीणच्या घरी गेली असता त्याने बळजबरी पीडितेवर अत्याचार केला आणि त्याचा व्हिडीओ बनवून नेकलेसची मागणी केल्यास हा व्हिडीओ सोशल मीडियावर पोस्ट करण्याची धमकी दिली. अखेर पीडितेने याबाबतची तक्रार हिंगणघाट पोलिसात दाखल केली असून, पोलिसांनी याप्रकरणी आरोपी प्रवीणविरुद्ध विविध कलमान्वये गुन्हा दाखल केला. आरोपीचा शोध पोलीस घेत असून लवकरच त्याला अटक करण्यात येणार असल्याची माहिती हिंगणघाट पोलिसांनी दिली.