चैतन्य जोशी
वर्धा : मित्राच्या शेतात नेत अल्पवयीन मुलीचे बळजबरी शोषण करुन तिला गर्भवती बनविल्याची धक्कादायक घटना शहरात उघडकीस आली. याप्रकरणी १५ रोजी शहर पोलीस ठाण्यात तक्रार दाखल करण्यात आली असून पोलिसांनी नराधम आरोपीस बेड्या ठोकल्याची माहिती दिली. ऋतीक उर्फ सुदर्शन गंगाधर वाडेकर (२०) रा. साबळे प्लॉट वर्धा. असे अटक केलेल्या आरोपीचे नाव आहे.
१७ वर्षीय पीडिता ही समुद्रपूर तालुक्यातील एका गावातील रहिवासी असून ती मागील काही वर्षांपासून वर्ध्यात शिक्षणासाठी किरायाच्या खोलीत राहते. तिची ओळख आरोपी ऋतीक वाडेकर याच्याशी स्वावलंबी विद्यालयाच्या मैदानात झाली होती. त्यानंतर दोघांत मैत्री झाली. जुलै २०२१ मध्ये देखील पीडिता आरोपी ऋतीकसोबत भेटली होती. जानेवारी २०२२ मध्ये ऋतीकने पीडितेला फोन करुन तिला भेटण्यासाठी गेला. दोघेही दुचाकीवर बसून वर्धा ते देवळी रस्त्याने फिरायला गेले. दरम्यान आरोपी ऋतीकने पीडितेला मित्राच्या शेतात नेत पीडितेचे बळजबरी शोषण केले.
फेब्रुवारी महिन्यातही असाच प्रकार त्याने पुन्हा केला. महाविद्यालयाला सुट्ट्या लागल्याने पीडिता तिच्या मुळ गावी गेली असता तिची प्रकृती बिघडली. पीडितेने सिंदी रेल्वे येथील रुग्णालयात जात तपासणी केली असता पीडिता ही सहा महिन्याची गर्भवती असल्याची धक्कादायक माहिती पुढे आली. १४ रोजी दुपारी ३ वाजताच्या सुमारास पीडितेला सेवाग्राम येथील रुग्णालयात उपचारार्थ दाखल करण्यात आले असून पीडितेवर सध्या सेवाग्राम येथील कस्तुरबा रुग्णालयात उपचार सुरु असल्याची माहिती आहे.
पीडितेने याबाबतची तक्रार शहर पोलिसांत दिली असून पोलिसांनी तक्रारीचे गांभीर्य लक्षात घेत आरोपी ऋतीक उर्फ सुदर्शन गंगाधर वाडेकर याला अटक केल्याची माहिती पोलिसांनी दिली.